रविको पासपोर्ट छानबिन गर्न विभिन्न कार्यालयबाट कागजात मागियो

सुरक्षा-अपराध

गृहपृष्ठ
सुरक्षा-अपराध
रविको पासपोर्ट छानबिन गर्न विभिन्न कार्यालयबाट कागजात मागियो

रविको पासपोर्ट छानबिन गर्न विभिन्न कार्यालयबाट कागजात मागियो

बिहीबार, माघ २६, २०७९ बागेश्वरी पोस्ट

नेपालगन्ज । राष्ट्रिय स्वतन्त्र पार्टीका सभापति रवि लामछिानेले पासपोर्ट लिएको विषयमा छानबिन प्रकृया अघि बढेको छ । सरकारी वकिलको कार्यालयले छानबिन प्रकृया अघि बढाएको हो ।

युवराज पौडेल (सफल) ले दिएको जाहेरीको सत्यता के हो, जाहेरीमा उल्लेख भए अनुसारको सत्यता हो कि होइन भन्ने परीक्षण गर्नका लाही सरकारी वकिल कार्यालयले राहदानी विभाग, जिल्ला प्रशासन कार्यालय र अध्यागमन विभागलाई पत्रचार गरी त्यसको विवरण माग गरेको हो ।

‘२०७९–१०–२४ गतेका दिन जिल्ला सरकारी वकिलको कार्यालय काठमाडौंमा रवि लामिछानेको राहदानी सम्बन्धमा जाहेरी परेकोमा सो विषयमा निम्न विवरण उपलब्ध गराईदिनु हुनः च. नं. १६४ रहि अध्यागमन विभागमा पत्राचार, च. नं. १६५ रहि जिल्ला प्रशासन कार्यालय काठमाडौं र च. नं. १६६ रहि राहदानी विभाग रवि लामिछानेले पासपोर्ट लिएको विषयमा जानकारी माग गराइदिनु हुन’, ती निकायलाई लेखिएको पत्रमा भनिएको छ ।

तीनवटै निकायबाट प्रमाण संकलन भएर पुष्टि भएपछि बल्ल जाहेरी दर्ताका लागि जिल्ला प्रहरी परिसर, काठमाडौंमा पठाउने योजना रहेको बताइएको छ ।

सर्वोच्च अदालतले माघ १३ गते लामिछानेले प्रयोग गर्दै आएको पुरानो नागरिकता अमान्य हुने फैसला गरेपछि सोही प्रमाणपत्र प्रयोगबाट भएका सबै कामको वैधानिकतामाथि चौतर्फी रूपमा प्रश्न उठ्न थालेपछि सोही प्रमाणपत्र प्रयोग गरेर लामिछानेले नेपाली राहदानी, सवारीचालक अनुमतिपत्र , कम्पनी दर्ता, स्थायी लेखा नम्बर (पान नम्बर) लगायत प्रमाणपत्र बनाएको विषयमा प्रश्न उठाइएको हो ।

यसैगरी सभापति लामिछानेको नाम मतदाता नामावलीबाट हटाउन माग गर्दै जिल्ला निर्वाचन कार्यालय काठमाडौंमा अर्को उजुरी परेको छ । अधिवक्ता अनुपम भट्टराईले लामिछानेको उक्त उजुरी दिएका हुन् ।

सर्वोच्चको फैसलाले अवैध ठहर गरेको लामिछानेले प्रयोग गर्दै आएको नागरिकता प्रमाणपत्र प्रयोग गरेर बनाएको काठमाडौं–३ को मतदाता नम्बर २६३४२९ को परिचय पत्र रद्द गर्न भट्टराईले माग गरेका छन् ।

लामिछानेले १० फागुन २०५० सालमा जिल्ला प्रशासन कार्यालय काठमाडौंबाट सुरुमा नागरिकताको प्रमाणपत्र लिएका थिए । अमेरिका गएपछि उनले २१ फेब्रुअरी २०१४ (९ फागुन २०७०)मा त्यहाँको नागरिकता प्राप्त गरे। अमेरिकाको नागरिकता पाएपछि ११ मे २०१५ (२८ वैशाख २०७२) मा उनी नेपाल फर्किए र १३ जेठमा नेपाली पासपोर्ट लिए । लामिछानेले अमेरिकी नागरिकता नत्यादै नेपाली पासपोर्ट लिएका थिए ।

प्रकाशित मिति: बिहीबार, माघ २६, २०७९ १३:३५

प्रतिक्रिया दिनुहोस्