नेपालगन्ज विमानस्थलमा अबदेखि व्यागेज लिँदा 'कन्वेयर बेल्ट' मार्फत

स्थानीय

गृहपृष्ठ
स्थानीय
नेपालगन्ज विमानस्थलमा अबदेखि व्यागेज लिँदा 'कन्वेयर बेल्ट' मार्फत

नेपालगन्ज विमानस्थलमा अबदेखि व्यागेज लिँदा 'कन्वेयर बेल्ट' मार्फत

शनिबार, माघ २८, २०७९ बागेश्वरी पोस्ट

नेपालगन्ज । नेपालगन्ज विमानस्थलको आगमन कक्षमा अत्याधुनिक ब्यागेज हैन्डलिङ सिस्टमको सुरुवात भएको छ । जस अन्तर्गत ‘कन्वेयर बेल्ट’ प्रणाली सञ्चालनमा ल्याइएको हो ।

नागरिक उड्डयन प्राधिकरणका उपमहानिर्देशक हंशराज पाण्डेले विमानस्थलको सेवा सुविधा वृद्धि गरेर यात्रुलाई बढी भन्दा बढी सहज सेवा प्रदान गर्ने उद्देश्यले नेपालगन्ज विमानस्थलमा शुक्रबारदेखि यो प्रणाली सञ्चालनमा ल्याइएको बताए ।

उनले अब विभिन्न ठाउँदेखि नेपालगन्ज पुगेका यात्रुको सामानलाई छिटो र छरितो तरिकाले उपलब्ध गराउन सकिएको बताए । दुई करोड बढीको लागतमा विमानस्थलको आगमन कक्षमा ‘कन्भेयर बेल्ट’ प्रणाली जडान गरिएको हो ।

यसअघि आगमन कक्षमा आएको यात्रुको सामानलाई कर्मचारीले हातले वितरण गर्दा निकै समय लाग्ने र झन्झटिलो समेत रहेको नागरिक उड्डयन कार्यालय नेपालगन्जका प्रमुख सुरेश खनालले बताए ।

उनले अब यात्रु र एयरलाइन्स दुवैलाई सामान लिन दिन सहज भएको बताए । विमानस्थलको आगमन कक्षमा जडान गरिएको कन्भेयर बेल्टको लम्बाइ ४०.६ मिटर र लगेज हैन्डलिङ क्षमता प्रति घण्टा दुई हजार ४०० देखि तीन हजारसम्म रहेको छ ।

नेपालका विभिन्न आन्तरिक विमानस्थलमा यात्रुको सेवासुविधा अभिवृद्धि गर्ने योजना अनुरूप पहिलो चरणमा नेपालगन्ज, विराटनगर र धनगढीमा ब्यागेज हैन्डलिङ सिस्टम अन्तर्गत कन्भेयर बेल्ट प्रणाली सञ्चालनमा ल्याइएको नागरिक उड्डयन प्राधिकरणले जनाएको छ ।

प्रकाशित मिति: शनिबार, माघ २८, २०७९ १३:४१

प्रतिक्रिया दिनुहोस्