बसले ठक्कर दिएर महिलाको मृत्यु भएपछि वीरेन्द्रनगर बजार तनावग्रस्त

सुरक्षा-अपराध

गृहपृष्ठ
सुरक्षा-अपराध
बसले ठक्कर दिएर महिलाको मृत्यु भएपछि वीरेन्द्रनगर बजार तनावग्रस्त

बसले ठक्कर दिएर महिलाको मृत्यु भएपछि वीरेन्द्रनगर बजार तनावग्रस्त

सोमबार, फागुन १, २०७९ बागेश्वरी पोस्ट

नेपालगन्ज । सुर्खेतको वीरेन्द्रनगरमा बसको ठक्करबाट महिलाको मृत्यु भएपछि पीडितहरुले आज बिहानैदेखि आन्दोलन गरिरहेका छन् । हिजो दिउँसो वीरेन्द्रनगर १० को बामेखोलामा बस्दै आएकी जाजरकोटको छेडागाड ६ की ६६ वर्षीय नदी रावतको वीरेन्द्रनगर बसपार्कमा बसको ठक्करबाट मृत्यु भएको थियो ।

ठक्कर दिएको बा.४ ख. ८०६१ नम्बरको बस चालकलाई कारबाही र उचित क्षतिपूर्तिको माग गर्दै आन्दोलनमा उत्रिएका मृतकका आफन्तहरुले कर्णाली प्रदेशको राजधानी वीरेन्द्रनगर बजार बन्द गराएका छन् ।

आन्दोलनकारीले वीरेन्द्रनगरका मुख्य चोकहरू यरिचोक, मंगलगढी चोक, एयरपोर्ट चोक र बसपार्कमा टायर बालेर सडकअवरुद्ध गरेका छन् ।

बुलुबुले चोकबाट बसपार्क आउँदै गरेको उक्त बसले जेब्रा क्रसिङबाट हिँडिरहेको अवस्थामा रावतलाई ठक्कर दिएको जिल्ला प्रहरी कार्यालय सुर्खेतका डिएसपी लक्ष्मण शाहीले बताए ।

सोही घटनालाई लिएर आफन्तहरूले आइतबार राति १० बजेसम्म बसपार्क, मंगलगढी चोक लगायतका ठाउँमा टायर बालेर आन्दोलन गरिरहेका थिए ।

उनीहरु आज बिहानैदेखि पुनः आन्दोलनमा उत्रिए छन् । आफन्तलाई नसोधेर शव उठाइएको भन्दै उनीहरू आक्रोशित बनेका छन् ।

ठाउँठाउँमा आन्दोलनकारी र प्रहरी बीच झडप भएको छ । यसका साथै, यातायात व्यवसायमा संलग्नहरू आन्दोलनकारी माथि जाइलागेका छन् । झडपका क्रममा पत्रकारसहित केही व्यक्ति घाइते भएका छन् ।

बस चालक फरार रहेका छन् भने बसलाई नियन्त्रणमा लिइएको छ । फरार बस चालकको खोजी कार्य भइरहेको जिल्ला प्रहरी कार्यालय सुर्खेतले जनाएको छ ।

प्रकाशित मिति: सोमबार, फागुन १, २०७९ १२:१०