कोहलपुरको ज्योति सामुदायिक वनलाई पर्यटकीय क्षेत्र बनाइँदै

स्थानीय

गृहपृष्ठ
स्थानीय
कोहलपुरको ज्योति सामुदायिक वनलाई पर्यटकीय क्षेत्र बनाइँदै

कोहलपुरको ज्योति सामुदायिक वनलाई पर्यटकीय क्षेत्र बनाइँदै

सोमबार, फागुन १, २०७९ बागेश्वरी पोस्ट

कोहलपुर । कोहलपुर नगरपालिका–८ स्थित तीन वटा सामुदायिक वनमा एक हजार ३ सय बढी विभिन्न प्रजातिका बोटविरुवा रोपिएका छन् ।

ज्योति सामुदायिक वन, सितल छायाँ सामुदायिक वन र सृष्टि सामुदायिक वनमा एक हजार ३ सय ७५वटा बोटविरुवा रोपिएको ज्योति सामुदायिक वन उपभोक्ता समूहका अध्यक्ष गणेश घर्ति मगरले जानकारी दिए । ज्योतिमा ४८४ र सितल छायाँ ४४५ र सृष्टिमा ४४६ वटा बोटविरुवा रोपिएको उनले बताए । लिची, अनार, कागती, केरा, आँप, ड्राइगन प्रजातिका बोटविरुवा रोपिएको हो । रोपिएको बोटविरुवाको संरक्षण र समन्वयको दायित्व ज्योति सामुदायिक वनले लिएको छ ।

भूसंरक्षण तथा जलाधार कार्यालय दाङ र डिभिजन वन कार्यालय बाँकेको आर्थिक सहयोगमा तालतलैयाको संरक्षण, सम्वद्र्धन तथा प्रबद्र्धन गर्ने उद्देश्यले बृक्षारोपणसँगै पोखरी निर्माण र तटबन्धन निर्माण गर्न लागिएको वडा अध्यक्ष लालबहादुर रानाले जानकारी दिए । उनका अनुसार तालतलैया तथा सामुदायिक वनको संरक्षण गर्ने उद्देश्यले करिव २२ लाखको लागतमा यो योजना सुरु भएको हो । सितलछायाँ सामुदायिक वनमा पर्ने डुडुवा खोलामा १२ लाखको लागतमा ५२ मिटर तटबन्धन निर्माण हुनेछ । यस्तै ज्योति सामुदायिक वनमा झण्डै हेक्टर क्षेत्रफलमा पोखरी निर्माण गरिँदैछ । पोखरी निर्माणपछि माछा पालनका रुपमा त्यसलाई उपयोग गर्ने तयारी वडाको छ । स्थानीयबासीको आयआर्जनमा पनि टेवा पुग्ने र पर्यटकीय गन्तव्यका रुपमा पनि विकास गर्ने उद्देश्य रहेको वडा अध्यक्ष रानाले बताए ।

जलाधार कार्यालयले पोखरी निर्माणका लागि ५ लाख सहयोग गरेको छ । जलाधार कार्यक्रमका प्रमुख शेषदत्त चौधरीले पोखरी, बोटविरुवा तथा तटबन्धनका लागि कार्यालयले चालू आर्थिक वर्षमा १९ लाख आर्थिक सहयोग गरेको जानकारी दिए । यसैगरी डिभिजन वन कार्यालयले पनि बोटविरुवा संरक्षणका लागि भनेर ३ लाख रुपैयाँ सहयोग गरेको कार्यालय प्रमुख अजित कर्णले बताए । कोहलपुर नगरपालिकालाई हरित नगर बनाउने र भएका तालतलैयाको संरक्षण गर्ने अभिप्रायका साथ विभिन्न तहबाट भइहेको सहयोग महत्वपूर्ण हुने नगर प्रमुख पूर्ण प्रसाद आचार्यको भनाई छ । ‘सकेसम्म यो क्षेत्रलाई हामीले पर्यटकीय क्षेत्रका रुपमा विकास गर्ने योजनामा छौं,' नगर प्रमुख आचार्यले भने–‘यहाँका तालतलैया तथा सामुदायिक वनलाई व्यवस्थित बनाउन सकियो भने कोहलपुर क्षेत्रबासीका लागि यो गतिलो सम्भावना हो ।’

प्रकाशित मिति: सोमबार, फागुन १, २०७९ २०:१२

प्रतिक्रिया दिनुहोस्