राप्तीसोनारी र नरैनापुरमा मोबाइल नेटवर्कको समस्याले स्थानीयलाई समस्या

स्थानीय

गृहपृष्ठ
स्थानीय
राप्तीसोनारी र नरैनापुरमा मोबाइल नेटवर्कको समस्याले स्थानीयलाई समस्या

राप्तीसोनारी र नरैनापुरमा मोबाइल नेटवर्कको समस्याले स्थानीयलाई समस्या

बुधबार, फागुन ३, २०७९ बागेश्वरी पोस्ट

नेपालगन्ज । नेपालकै सुगम भनेर चिनिने बाँके जिल्लाको केही गाउँपालिकामा अझै नेपाल टेलिकमको सेवा विस्तार हुन नसक्दा सेवाग्राहीलाई सास्ती हुँदै आएको छ ।

जिल्लाका राप्तीसोनारी र नरैनापुर गाउँपालिकामा पर्याप्त टावर नहुँदा मोबाइल र सो सम्बन्धि अन्य सेवा राम्ररी नचल्दा स्थानीयले सास्ती भोग्नु परेको स्थानीयहरु बताउँछन् ।

राप्तीसोनारी र नरैनापुरमा टेलिकमका थप १० वटा टावर राख्न टेलिकमसँग माग गरिएको छ  । टेलिकमको केन्द्रीय कार्यालयले यसअघि टेन्डर आह्वान गरेको १५० वटा टावरमध्ये १० वटा टावर राप्तीसोनारी र नरैनापुरमा जडान गर्न माग गरिएको छ ।

लुम्बिनी प्रदेशका आन्तरिक मामिला, कानुन तथा सहकारी मन्त्री कृष्णा केसीले राप्तीसोनारीका ८ र नरैनापुरका ३ वटा वडामा नेपाल टेलिकमको टावर रहेको र त्यसबाट पर्याप्त नेटवर्क प्राप्त नभएकाले थप १० वटा टावर तत्काल जडानका लागि पहल गरिएको बताइन् ।

थप टावर जडानका लागि नेपाल टेलिकमको प्रदेश कार्यालय र केन्द्रीय कार्यालय दुवै स्थानमा माग गरिएको मन्त्री केसीले बताइन् । उता राप्तीसोनारी र नरैनापुरका धेरैजसो गाउँबस्तीमा टेलिकमको नेटवर्क नटिप्ने समस्या भएपछि टावर जडानका लागि पहल गरिदिन मन्त्रीलाई आग्रह गरिएको नरैनापुर गाउँपालिकाका अध्यक्ष इस्तियाक अहमद साहले बताए ।

विशेषगरी कोहलपुर नगरपालिकाको चप्परगौडीदेखि दाङको सिमाना शिव खोलासम्मको करिब ७० किलोमिटर दूरीमा टेलिफोन टावरको बढी समस्या छ । उक्त क्षेत्रलाई समेट्ने गरी टावरको माग गरिएको राप्तीसोनारीका अध्यक्ष तप्त पौडेलले बताए ।

राप्तीसोनारी र नरैनापुरमा रहेको टेलिकम टावरको रेन्ज कम भएकाले ती टावरको स्तरोन्नति गरी रेन्ज बढाउन पनि माग गरिएको अध्यक्ष पौडेलको भनाई छ । नरैनापुरको सीमावर्ती क्षेत्रहरूमा टेलिकमको नेटवर्कले काम नगर्दा स्थानीयहरुले नेपाली सिमको प्रयोग गरेपनि सहजताका लागि भारतीय मोबाइलको समेत प्रयोग गर्दै आइरहेको नरैनापुरका लेखा अधिकृत भरत बस्नेतले बताए ।

प्रकाशित मिति: बुधबार, फागुन ३, २०७९ १६:३९

प्रतिक्रिया दिनुहोस्