बालाजु घटना छानबिन गर्न सुरक्षा प्रमुखहरुलाई प्रधानमन्त्रीको निर्देशन

सुरक्षा-अपराध

गृहपृष्ठ
सुरक्षा-अपराध
बालाजु घटना छानबिन गर्न सुरक्षा प्रमुखहरुलाई प्रधानमन्त्रीको निर्देशन

बालाजु घटना छानबिन गर्न सुरक्षा प्रमुखहरुलाई प्रधानमन्त्रीको निर्देशन

बुधबार, फागुन ३, २०७९ बागेश्वरी पोस्ट

नेपालगन्ज । सोमबार साँझ काठमाडौंको गोंगबुमा भएको घटनाको छानबिन गर्न प्रधानमन्त्री पुष्पकमल दाहाल ‘प्रचण्ड’ ले सुरक्षा अङ्गका प्रमुखहरूलाई निर्देशन दिएका छन् ।

आज दिउँसो प्रधानमन्त्री तथा मन्त्रिपरिषद कार्यालय सिंहदरबारमा बोलाएर प्रधानमन्त्रीले घटनाको गहिरो गरी छानबिन र अन्यायमा परेका सबैले समुचित न्याय पाउने गरी कारबाही गर्न निर्देशन दिएका हुन् ।

गृह मन्त्रालय समेत सम्हालिरहेका प्रधानमन्त्री प्रचण्डले भने, ‘गोंगबुमा सोमबार भएको घटनालाई मैले गम्भीर रूपमा लिएको छु । राजधानीमा नै यस प्रकृतिका घटना हुँदा घटनालाई राज्यले गम्भीर रूपमा लिनुपर्छ । घटनाको पृष्ठभूमि के छ, के कारणले त्यस्तो अप्रिय घटना घट्न पुग्यो, त्यसमा दोषी कोको छन्, त्यो सबै कुराको गहिरो गरी अनुसन्धान गर्नुस् । लुटपाटको घटना झन् गम्भीर छ, त्यसमा दोषीलाई कारबाही गर्नुस् र जो पीडित छन्, उनीहरू छिटो भन्दा छिटो न्याय पाउने वातावरण बनाउनुस् ।’

छलफलमा नेपाल प्रहरी, सशस्त्र प्रहरी बल र राष्ट्रिय अनुसन्धानका प्रमुखहरूले बसपार्क क्षेत्रमा केही विवाद भए पनि यति अप्रिय घटना होला भनेर आफूहरूले पूर्व अनुमान नगरेको बताए ।

घटनामा ३३ प्रहरी घाइते भएको, शान्तिसुरक्षाको पूर्व अनुमान गर्न नसकेको, प्रहरीको सावधानीका कारण मानवीय क्षति नभएको र विवादकै बीच लुटेरा समूहले फाइदा उठाएको प्रारम्भिक अनुसन्धानले देखाएको उनीहरूले ब्रिफिङ गरेका छन् ।

मोबाइल व्यवसायी संघका प्रतिनिधिहरूले आजै प्रधानमन्त्री प्रचण्डलाई भेटेर दोषीलाई कारबाही र क्षतिपूर्ति उपलब्ध गराउन ध्यानाकर्षण गराएका छन् ।

यो घटनामा ८ करोड भन्दा बढीको मोबाइल फोन चोरी भएको उनीहरूको भनाई छ ।

प्रकाशित मिति: बुधबार, फागुन ३, २०७९ १६:५७

प्रतिक्रिया दिनुहोस्