अतिक्रमण गरी राप्ती सोनारीको झगडिया गाउँ नजिक बनाइएका ५५ घर भत्काइए

स्थानीय

गृहपृष्ठ
स्थानीय
अतिक्रमण गरी राप्ती सोनारीको झगडिया गाउँ नजिक बनाइएका ५५ घर भत्काइए

अतिक्रमण गरी राप्ती सोनारीको झगडिया गाउँ नजिक बनाइएका ५५ घर भत्काइए

शनिबार, फागुन १३, २०७९ बागेश्वरी पोस्ट

नेपालगन्ज । सरकारी वन अतिक्रमण गरी बनाइएका बाँकेका ५५ वटा घरहरु भत्काइएका छन् । जिल्ला वन कार्यालय बाँकेले राप्ती सोनारी गाउँपालिका वडा नम्बर ७ स्थित झगडिया गाउँ नजिक रहेको हुलाकी सडकको छेउमा रहेका घरटहरा भत्काएको सहायक वन अधिकृत गणेश खड्काले जानकारी दिएका छन् ।

सर्वदलीय बैठकको निर्णय अनुसार १० दिने सूचना जारी गरेर ती घर टहरा भत्काएको उल्लेख गर्दै उनले राप्ती नदी पूर्व पर्ने हुलाकी सडक छेउको धेरैजसो सरकारी वन क्षेत्र अतिक्रमणको चपेटामा परेको उनले बताए ।

जिल्लाको कोहलपुर सबडिभिजन वन कार्यालय अन्तर्गतको कोहलपुर ८ स्थित शीतलछाँया सामुदायिक वन, कोहलपुर ७ स्थित आस्था सामुदायिक वन, कोहलपुरको विन्ध्यवासिनी सामुदायिक वन, बागेश्वरी सामुदायिक वन, ज्योति सामुदायिक वन र वैजनाथ गाउँपालिकाको खैरेनी सामुदायिक वन, प्रगतिशील सामुदायिक वनमा अतिक्रमण गरी २० घर टहरा निर्माण भएको थियो ।

सो अतिक्रमण विसं २०५८ देखिको भएको बताइएको छ । सिक्टा सबडिभिजन वन कार्यालयअन्तर्गत राप्ती सोनारी गाउँपालिकाको वडा नं १, ३, ४ स्थित रामजानकी, बागेश्वरी, लामीडाँडा, गाइलेख, सुनधारा सामुदायिक वनको जग्गा अतिक्रमण भएको छ । सो अतिक्रमण हटाइएको र पुनः बसेकाले हटाइएको छ । त्यहाँ अतिक्रमण भएको वन करिब ४२ हेक्टर छ ।

नरैनापुर सबडिभिजन वन कार्यालय अन्तर्गत वडा नं १, २, ३, ४, ५, ६ का किसान, झरनिका, गाजी, शान्ति, समिर, सदाबहार लगायत नामका सामुदायिक वनको करिब १७५ हेक्टर क्षेत्रफलको वन अतिक्रमण भएको जिल्ला वन कार्यालय बाँकेले बताएको छ ।

नेपालगञ्ज सबडिभिजन वन कार्यालय अन्तर्गत डुडुवास्थित हजरत, झोरा, वभनपूर्वा सामुदायिक वनको करीब ३२ हेक्टर क्षेत्रफलमा अतिक्रमण भएको बताइएको छ । राप्ती सव डिभिजन वन कार्यालयअन्तर्गत समयभवानी, सुनखोली, सिद्धेश्वरी, कर्णेराज, राप्तीपीडित, भगवती, कुशुमिया, सिद्धबाबालगायत सामुदायिक वनको करिब १९० हेक्टर क्षेत्रफल अतिक्रमण भएको छ ।

शम्शेरगञ्ज सबडिभिजन वन कार्यालय अन्तर्गत हरियाली, जनकल्याण, हरलाफाटा, सिद्धसाई कुमारी, दुर्गा भवानी, जनमुखी, कोटहीदेवी, मधु सामुदायिक वनको करीब ३० हेक्टर क्षेत्रफलमा अतिक्रमण भएको बताइएको छ । वर्षौंदेखि अतिक्रमण भए पनि स्थानीयस्तरमा राजनीतिक सहमति कायम नहुँदा अतिक्रमण हटाउन नसकिएको जिल्ला वन कार्यालयले बताएको छ ।

प्रकाशित मिति: शनिबार, फागुन १३, २०७९ ०९:०१

प्रतिक्रिया दिनुहोस्