देशभरका नागरिकले काठमाडौंबाट राष्ट्रिय परिचयपत्र बनाउन पाउने

समाचार

गृहपृष्ठ
समाचार
देशभरका नागरिकले काठमाडौंबाट राष्ट्रिय परिचयपत्र बनाउन पाउने

देशभरका नागरिकले काठमाडौंबाट राष्ट्रिय परिचयपत्र बनाउन पाउने

बिहीबार, फागुन १८, २०७९ बागेश्वरी पोस्ट

नेपालगन्ज । राष्ट्रिय परिचयपत्रको आवेदन दिन र प्राप्त गर्नका लागि काठमाडौं बाहिर रहेका जिल्लावासीलाई सरकारले काठमाडौंमा थप पाँच स्थान तोकेको छ । यो सँगै अब देशभरका नागरिकले काठमाडौंबाट राष्ट्रिय परिचयपत्रका लागि आवेदन दिन सक्ने भएका छन् ।

राष्ट्रिय परिचयपत्रका लागि जिल्ला प्रशासन कार्यालय काठमाडौं र ललितपुरका अलावा नारायणहिटी दरबार परिसर, राष्ट्रिय सभागृह, विभागकै परिसरमा आवेदन दिन सकिनेछ ।

जिल्ला प्रशासन कार्यालय काठमाडौंमा बागमती प्रदेशका ललितपुर र भक्तपुर बाहेकका सबै जिल्ला तथा मधेश प्रदेशका पर्सा र धनुषाका सेवाग्राहीले आवेदन दिनसक्ने व्यवस्था गरिएको छ ।

यस्तै, जिल्ला प्रशासन कार्यालय ललितपुरमा कर्णाली प्रदेश र सुदूरपश्चिम प्रदेशका सबै जिल्ला र मधेश प्रदेशका सप्तरी, सर्लाहीका जिल्लाका सेवाग्राहीले आवेदन दिन सक्नेछन् ।

त्यस्तै, नारायणहिटी दरबार परिसरमा कोशी, लुम्बिनी र गण्डकी प्रदेशका सबै जिल्ला र मधेश प्रदेशका सिरहा, महोत्तरी, बारा र रौतटहका सेवाग्राहीले आवेदन दिनसक्ने व्यवस्था मिलाइएको छ । यस्तै विभाग परिसरमा नेपाल सरकार तथा मातहतका कर्मचारी, पूर्व कर्मचारी तथा विशिष्ट पदाधिकारीले आवेदन दिन सक्नेछन् ।

त्यस्तै, राष्ट्रियसभा गृह प्रदर्शनीमार्गमा राष्ट्रसेवक कर्मचारीका परिवारले आवेदन दिन सक्नेछन् । हाल देशैभरिका ७७ वटै जिल्ला प्रशासन कार्यालय र ४२ वटा इलाका प्रशासन कार्यालयबाट राष्ट्रिय परिचयपत्रको आवेदन दिन सकिन्छ ।

परिचयपत्रको विवरण प्रविष्ट गर्नका लागि नागरिकताको प्रमाणपत्र, बसाइँसराइ गरी आएकाको हकमा बसाइँसराइको सक्कल प्रमाणपत्र, विवाहितको हकमा विवाह दर्ता प्रमाणपत्रको सक्कल र कर्मचारी भए कार्यालयको सिफारिश र पूर्व कर्मचारी भए पेन्सन पट्टा आवश्यक पर्नेछ ।

प्रकाशित मिति: बिहीबार, फागुन १८, २०७९ १५:१०

प्रतिक्रिया दिनुहोस्