जानकी-३ इन्द्रपुरमा नवनिर्मित स्वास्थ्य चौकी भवनको उद्घाटन

स्थानीय

गृहपृष्ठ
स्थानीय
जानकी-३ इन्द्रपुरमा नवनिर्मित स्वास्थ्य चौकी भवनको उद्घाटन

जानकी-३ इन्द्रपुरमा नवनिर्मित स्वास्थ्य चौकी भवनको उद्घाटन

आइतबार, चैत २६, २०७९ बागेश्वरी पोस्ट

नेपालगञ्ज । नेपाली कांग्रेसका सह-महामन्त्री एवम् संघीय सांसद किशोरसिंह राठोरले बाँकेको जानकी गाउँपालिका वडा नम्वर ३ इन्द्रपुरमा निर्माण भएको स्वास्थ्य चौकी भवनको उद्घाटन गरेका छन् । राठौरले स्वास्थ्य चौकी भवनको आज उद्घाटन गरेका हुन् । स्वास्थ्य चौकी भवन गाउँपालिकाको ६० लाख लागतमा निर्माण भएको हो ।

उद्घाटन कार्यक्रमलाई सम्बोधन गर्दै राठौरले आफूले सक्ने कुरा मात्र गर्ने र जनतालाई अरु नेताले जस्तो झुठा आश्वासन दिने आफ्नो बानी नरहेको बताए । उनले स्वास्थ्य चौकीबाट जनता प्रत्यक्ष लाभान्वित भए नभएको अवस्थाका बारेमा जनप्रतिनिधिहरुले निरन्तर अनुगमन गर्नुपर्ने बताए । गाउँपालिकाका अध्यक्ष छब्बन खाँले स्वास्थ्यमा जानकी गाउँपालिका जिल्लामै पहिलो नम्बरमा परेको उल्लेख गर्दै आफू निर्वाचित भएर आएपछि स्वास्थ्यमा बढी बजेट छुट्टयाएको बताए । यस पटकको बजेटमा केन्द्रले नै २० देखि २५ प्रतिशत बजेट कटौती गरिदिएकोले केही समस्या भएको उनको भनाई छ । सम्पूर्ण कर्मचारी एवम् आमनागरिकहरुले साथ र सहयोग दिएमा जानकी गाउँपालिकाको मुहार नै फेरिदिने खाँले बताए ।

निर्माण सम्पन्न भएको स्वास्थ्य चौकी भवनको लागि चार कठ्ठा जग्गा दान गरेका निवर्तमान वडा अध्यक्ष विन्देश्वरी कुर्मीले आफ्नो पालामा शुरु गरिएको कामले पूर्णता पाउँदा अब स्थानीयबासी प्रत्यक्ष लाभान्वित हुने भन्दै खुसी व्यक्त गरे । कार्यक्रममा पालिकाकी उपाध्यक्ष रामप्यारी यादव, वडा नम्वर ३ का वडा अध्यक्ष राजकुमार कुर्मी, सामाजिक विकास समिति संयोजक रामआँचल धोवी, गाउँपालिका अध्यक्ष खाँका परामर्शदाता शोहराव दर्जी, वडा सदस्यहरु, स्वास्थ्य शाखा प्रमुख दल वहादुर राना, स्वास्थ्यका कर्मचारीहरु लगायत स्थानीयबासीहरुको समेत उपस्थिति रहेको थियो ।

प्रकाशित मिति: आइतबार, चैत २६, २०७९ २०:१८

प्रतिक्रिया दिनुहोस्