घरेलु हिंसापीडित महिलालाई कोहलपुर नगरपालिकाको आर्थिक सहयोग

स्थानीय

गृहपृष्ठ
स्थानीय
घरेलु हिंसापीडित महिलालाई कोहलपुर नगरपालिकाको आर्थिक सहयोग

घरेलु हिंसापीडित महिलालाई कोहलपुर नगरपालिकाको आर्थिक सहयोग

आइतबार, वैशाख ३, २०८० बागेश्वरी पोस्ट

कोहलपुर । कोहलपुर नगपालिका–२ शक्तिनगरकी घरेलु हिंसापीडित एक जना महिलालाई कोहलपुर नगरपालिकाले आर्थिक सहयोग गरेको छ । गएको माघ १५ गते स्थानीय भानुभक्त विकले आफ्नै श्रीमती गंगा विक र छोरा प्रिन्सलाई पेट्रोल छर्केर आगो लगाएका थिए । गंगाको ज्यान जोगिए पनि छोरा प्रिन्सको भने उपचारका क्रममा मृत्यु भएको थियो ।

कोहलपुर नगरपालिकाले हिंसा पीडित राहत कोषबाट गंगालाई ५० हजार रुपैयाँ आर्थिक सहायता गरेको हो । आज एक कार्यक्रमका बीच नगरपालिकाका कार्यबहाक नगर प्रमुख संगिता सुवेदी, वडा नं २ का वडा अध्यक्ष हरिसिंह कठायत र कार्यपालिका सदस्य तथा नगरपालिकाका सामाजिक विकास समिति संयोजक इश्वरीप्रसाद विश्वकर्माले गंगालाई चेक हस्तान्तरण गरेका हुन् ।

कार्यक्रममा बोल्दै कार्यवहाक नगर प्रमुख सुवेदीले आर्थिक अवस्था कमजोर भएकी गंगालाई सहयोग पुगोस् भन्ने उद्देश्यले राहत कोषबाट आर्थिक सहायता गरिएको बताइन् । उनले गंगाको समस्या प्रत्येक महिलाको समस्या भएकाले घरेलु हिंसाविरुद्ध एक हुन सबैलाई आह्वान गरिन् । उनले घरेलु हिंसा विरुद्ध नगरपालिकाले जनचेतनामूलक कार्यक्रमलाई तीब्रताका साथ अगाडि बढाउने बताइन् ।

सुवेदीले कुनै पनि महिला हिंसाको सिकार हुन नपरोस् भन्ने सवालमा नगरपालिका गम्भीर रहेकाले यसबारेमा चेतना फैलाउन जरुरी रहेको समेत उल्लेख गरिन् । उनले घरेलु हिंसा अन्त्यका लागि महिलाहरुलाई आर्थिक आयआर्जनसँग जोड्ने गरी नगरपालिका लागिरहेको पनि बताइन् । सीपमूलक तालिम प्रदान गरेर महिलाहरुलाई आयआर्जनमा केन्द्रित गराउने गरी आफूहरुले योजना बनाइरहेको पनि उनले बताइन् ।

यस्तै वडा नम्बर २ का वडा अध्यक्ष कठायतले घरेलु हिंसाविरुद्ध बोल्न आग्रह गरे । गंगाको जीवन रक्षाका लागि स्थानीयबासीले ठूलो सहयोग गरेको भन्दै उनले यस्ता हिंसा अन्त्यका लागि सबैको सहयोग हुन आवश्यक रहेको बताए । यस्तै कार्यपालिका सदस्य विकले यस्ता जधन्य अपराध हुन नदिन जनचेतनामूलक कार्यक्रमलाई प्राथमिकता दिइनु पर्ने बताए । घटना हुनै नदिने गरी समाजमा अग्रिम बहस चलाउन आवश्यकता रहेको समेत उनको भनाई छ ।

पालिकाले आर्थिक सहयोग गरेकोप्रति गंगाले खुसी व्यक्त गरेकी थिइन् । उनले छिमेकी तथा वडाका जनप्रतिनिधि र पालिकाले आफ्नो उपचारमा ठूलो सहयोग गरेको भन्दै धन्यवाद समेत दिएकी थिइन् । भानुभक्त अहिले पूर्पक्षका लागि कारागारमा छन् । कार्यक्रममा स्थानीयबासीहरुले आफ्नो टोलको अन्य समस्याबारे पनि जनप्रतिनिधिहरुको ध्यानाकर्षण गराएका थिए ।

प्रकाशित मिति: आइतबार, वैशाख ३, २०८० २०:४८

प्रतिक्रिया दिनुहोस्