सुर्खेतमा ६ महिनाको अवधिमा २२१ सम्बन्ध विच्छेद मुद्दा दर्ता

समाचार

गृहपृष्ठ
समाचार
सुर्खेतमा ६ महिनाको अवधिमा २२१ सम्बन्ध विच्छेद मुद्दा दर्ता

सुर्खेतमा ६ महिनाको अवधिमा २२१ सम्बन्ध विच्छेद मुद्दा दर्ता

शनिबार, माघ ११, २०७६ बागेश्वरी पोस्ट

सुर्खेत ।सुर्खेतमा सम्बन्ध विच्छेदका मुद्दा दर्ता हुने क्रम बढदै गएको छ।जिल्ला अदालत सुर्खेतमा ६ महिनाको अवधिमा २२१ सम्बन्ध विच्छेदका मुद्दा दर्ता भएका छन्।

चालु आर्थिक वर्षको साउन महिनादेखि पुस महिनासम्म २२१ सम्बन्ध विच्छेदका मुद्दा दर्ता भएको जिल्ला अदालत सुर्खेतले जनाएको छ। चालु आर्थिक वर्षको ६ महिनाभित्र सबभन्दा धेरै मुद्दा सम्बन्ध विच्छेदसम्बन्धी नै भएको अदालतले जनाएको छ। जिल्ला अदालतका अनुसार साउनमा ५७, भदौमा ३१, असोजमा १९, कात्तिकमा ४१, मंसिरमा ४१, पुसमा ३२ वटा सम्बन्ध विच्छेदका मुद्दा दर्ता भएका छन्।

यीमध्ये हालसम्म ७० वटा मुद्दा फर्छ्यौट भएका छन् भने १५१ वटा बाँकी छन्। गत आर्थिक वर्षबाट जिम्मेवारी सरेर आएका मुद्दासहित जिल्ला अदालतमा अब २१४ सम्बन्ध विच्छेदका मुद्दा फर्छ्यौट हुन बाँकी रहेका छन्। एक वर्ष अघिदेखि लागू भएको नयाँ मुलुकी संहितामा पुरूषले पनि सम्बन्ध विच्छेदको मुद्दा दिन पाउने व्यवस्थापछि मुद्दा बढ्दै गएको जिल्ला न्यायाधीश राजेन्द्र कुमार आचार्यले जानकारी दिए।

उनका अनुसार बालविवाह भएकाहरूबाट धेरै मुद्दा आउने गरेका छन्। घरेलु हिंसा, बहुविवाहको विषयलाई लिएर पनि सम्बन्ध विच्छेदका मुद्दा पर्ने गरेका छन्।

उनका अनुसार यो आर्थिक वर्षको ६ महिनामा जबर्जस्ती करणीका ६०, लागू औषधसम्बन्धी ३०, बहुविवाहसम्बन्धी ११, बालविवाहसम्बन्धी १, घरेलु हिंसासम्बन्धी ३४, आत्महत्या दुरुत्साहनसम्बन्धी ६, सवारी ज्यान कर्तव्यसम्बन्धी १४ र कर्तव्य ज्यानसम्बन्धी १५ मुद्दा जिल्ला अदालतमा दर्ता भएका छन्।सेतोपाटीबाट।

प्रकाशित मिति: शनिबार, माघ ११, २०७६ १०:३२