कोहलपुरको झन्डहवामा बेसिक सिलाइकटाई तालिम सुरु

स्थानीय

गृहपृष्ठ
स्थानीय
कोहलपुरको झन्डहवामा बेसिक सिलाइकटाई तालिम सुरु

कोहलपुरको झन्डहवामा बेसिक सिलाइकटाई तालिम सुरु

मंगलबार, वैशाख १२, २०८० बागेश्वरी पोस्ट

कोहलपुर । मुस्लिम महिलालाई लक्षित गरी कोहलपुर नगरपालिका-९ झन्डहवामा आजदेखि बेसिक सिलाइकटाई तालिम सुरु भएको छ । कोहलपुर नगरपालिकाको सहयोगमा फातिमा फाउन्डेसन- नेपालको आयोजनामा तीन महिने तालिम सुरु भएको हो । फातिमा फाउन्डेसनका अध्यक्ष मैमुना सिद्दिकीको सभापतित्वमा सुरु भएको तालिमको उद्घाटन गर्दै कोहलपुर नगरपालिकाका नगर उपप्रमुख संगिता सुवेदीले मुस्लिम समुदायका महिलालाई सीपमूलक तालिम प्रदान गरेर उनीहरुलाई आर्थिकरुपमा सवल बनाउने उद्देश्य रहेको बताइन् ।

सिलाइकटाई तालिमपछि सीपलाई व्यवसायिक बनाउन उनले सुझाब दिइन् । उनले सीपलाई व्यवसायिक गराउन सके मात्र तालिमको उपलब्धि प्राप्त हुने बिश्वास व्यक्त गर्दै यसलाई अझै एड्भान्स बनाउने प्रतिबद्धता व्यक्त गरिन् । सीपलाई व्यवसायिक बनाउनेलाई मेसिन समेत नगरपालिकाले प्रदान गर्ने पनि उनको प्रतिबद्धता थियो । उनले कोहलपुर नगरपालिकाभित्रका महिलालाई आर्थिकरुपमा सशक्त बनाउन नगरपालिकाले विभिन्न सीपमूलक तालिम प्रदान गर्दै आएको पनि उल्लेख गरिन् ।

त्यस्तै कोहलपुर नगरपालिका आर्थिक समिति संयोजक अनिता बुढाले अन्य समुदायका महिला भन्दा मुस्लिम समुदायका महिला पिछडिएको पाइएकाले उनीहरुलाई घर बाहिरको समाजमा घुलमिल गराउँदै रोजगारतर्फ उन्मुख गराउन तालिमले महत्त्वपूर्ण भूमिका निर्वाह गर्ने बताइन् । कार्यक्रममा महिला तथा बालबालिका शाखा अधिकृत सुशिला थापा, फातिमा फाउन्डेसनका बोर्ड सदस्य गंगा वली लगायतले बोलेका थिए । २० जना मुस्लिम महिलाको सहभागिता रहेको तालिमको प्रशिक्षकमा ओकीकुमारी आलय रहेको फातिमा फाउन्डेसनका कोषाध्यक्ष सुवेदा फराहिनले जानकारी दिइन् ।

प्रकाशित मिति: मंगलबार, वैशाख १२, २०८० १२:२३

प्रतिक्रिया दिनुहोस्