घरभाडा छुटको माग गर्दै कोहलपुरका नगर प्रमुखलाई ध्यानाकर्षणपत्र

स्थानीय

गृहपृष्ठ
स्थानीय
घरभाडा छुटको माग गर्दै कोहलपुरका नगर प्रमुखलाई ध्यानाकर्षणपत्र

घरभाडा छुटको माग गर्दै कोहलपुरका नगर प्रमुखलाई ध्यानाकर्षणपत्र

बुधबार, वैशाख २०, २०८० बागेश्वरी पोस्ट

कोहलपुर । व्यवसायिक हकहित संरक्षण समिति कोहलपुरले घरभाडा छुट लगायतको माग राखेर आज कोहलपुर नगरपालिकालाई ध्यानाकर्षणपत्र बुझाएको छ । समितिका संयोजक राजेन्द्र कुमार श्रेष्ठ र सचिव तिलकसिंह कार्कीको हस्ताक्षर सहितको ध्यानाकर्षणपत्र नगर प्रमुख पूर्णप्रसाद आचार्य र प्रमुख प्रशासकीय अधिकृत टिकाराम ढकाललाई बुझाएको हो ।

दुई वर्ष अघिको कोरोना महामारीका कारण व्यापार व्यवसाय धरासायी भएको भन्दै नगर विकास समितिको स्वामित्वमा रही बहालमा लगाइएका घर सटरहरुको सम्झौतामा कवुल गरिएको भाडामा कम्तिमा १५ देखि २० प्रतिशतसम्म छुट गर्न आग्रह गरिएको संयोजक श्रेष्ठले बताए । ‘नगर विकास समिति तथा स्थानीय सरकार जनताको अभिभावक भएकाले यही कुरालाई मनन गरेर नगर विकास समितिको स्वामित्वमा रहेका सम्झौता कवुल गरिएका घर सटरमा कम्तिमा पनि १५ देखि २० प्रतिशत छुट हुनुपर्छ भन्ने हाम्रो माग हो, उनले भने–‘अवस्था सुधार भएपछि सम्झौता अनुसार घर सटर भाडा दिन हामीलाई कुनै गाह्रो छैन ।’ उनले अहिले व्यवसायीहरु धमाधम सटर वन्द गरेर पलायन हुने अवस्था आएको समेत दुःखेसो पोखे ।

यस्तै उनले मापदण्ड बनाएर निजी घरको अगाडि जस्तापाता (पाली) राख्न दिन पनि नगरपालिकासँग आग्रह गरे । ‘नगर विकास समिति क्षेत्रभित्र रहेका निजी घरहरुको अगाडि भागमा लगाइएका जस्तापाता (पाली) भत्काइएको छ । जसका कारण गर्मी तथा बर्षायाममा बस्न नसकिने र बाटो हिँड्ने बटुवाहरुलाई पनि सहजताको लागि र सामान, लत्ताकपडा, घामले खुइलिएर नोक्सान हुने भएकाले कम्तिमा नगर विकास समितिले मापदण्ड बनाएर जस्तापाता प्रयोग गर्न दिनु पर्छ’ उनको भनाई थियो । त्यसक्रममा नगर प्रमुख आचार्यले आफूले नगरको समग्र विकासका निमित्त काम गरिरहेको भन्दै मागप्रति सकारात्मक रहेको बताए । उनले सबै पक्षबीच छलफल र परामर्श गरेर अघि बढ्ने विश्वास दिलाए ।

ध्यानाकर्षणपत्र बुझाउन नेपाल उद्योग बाणिज्य महासंघका निवर्तमान केन्द्रीय सदस्य चक्र अधिकारी, समितिका संयोजक राजेन्द्रकुमार श्रेष्ठ, सह–संयोजक विष्णुप्रसाद खनाल, सचिव तिलकसिंह कार्की, समितिका सदस्य शेषकान्त शर्मा लगायत नगरपालिका पुगेका थिए । व्यवसायिक हकहित संरक्षण समितिले पछिल्लो समय बैंकको ब्याजदर घटाउनुपर्ने माग समेत राखेर दवावमूलक कार्यक्रम गर्दै आएको छ ।

प्रकाशित मिति: बुधबार, वैशाख २०, २०८० १८:४७

प्रतिक्रिया दिनुहोस्