नक्कली भुटानी शरणार्थी प्रकरणमा अझै १ दर्जन पक्राउ पर्न सक्छन्: एसएसपी कार्की

सुरक्षा-अपराध

गृहपृष्ठ
सुरक्षा-अपराध
नक्कली भुटानी शरणार्थी प्रकरणमा अझै १ दर्जन पक्राउ पर्न सक्छन्: एसएसपी कार्की

नक्कली भुटानी शरणार्थी प्रकरणमा अझै १ दर्जन पक्राउ पर्न सक्छन्: एसएसपी कार्की

बिहीबार, वैशाख २१, २०८० बागेश्वरी पोस्ट

नेपालगन्ज । नेपालीलाई नक्कली भुटानी शरणार्थी बनाएर अमेरिका पठाउने ठगी धन्दामा धमाधम उच्च पदस्थ व्यक्तिहरु पक्राउ पर्ने क्रम जारी छ ।

यस काण्डमा मुछिएकाहरुको नाम मुख्य योजनाकारले धमाधम खोलेपछि पूर्वउपप्रधान मन्त्रीसहित बहालवाला सचिव समेत संलग्न रहेको कुरा खुलेको हो।

नक्कली शरणार्थी काण्डमा पूर्वउपप्रधानमन्त्री, बहालवाला सांसद एवम नेकप एमालेका पार्टी सचिव टोपबहादुर रायमाझी, गृह मन्त्रालयका पूर्व सचिव हाल उपराष्ट्रपति कार्यालय सचिव टेकनारायण पाण्डे, टोपबहादुर रायमाझी पुत्र सन्दीप रायमाझी, पूर्व गृहमन्त्री रामबहादुर थापा 'बादल' पुत्र प्रतीक थापादेखि डा. इन्द्रजित राई, उनका पुत्र सगर राई लगायतका अन्य व्यक्ति रहेको तथ्य बाहिर आएको हो ।

यस काण्डमा मुछिएर अहिलेसम्म केशव दुलाल, सानु भट्टराई, टंककुमार गुरूङ, इन्द्रजित राई, टेकनारायण पाण्डे, सन्देश शर्मा, सागर राई र सन्दीप रायमाझी पक्राउ परिसकेका छन् ।

यस काण्डमा मुछिएका पूर्व उपप्रधानमन्त्री रायमाझीलाई जिल्ला अदालत काठमाडौंले पक्राउ पुर्जी जारी गरेको छ । उनी हाल प्रहरीको सम्पर्क बाहिर छन् ।

यस घटनामा पक्राउ परिसकेकाहरु बयान अनुसार अझै एक दर्जन बढी पक्राउ पर्न सक्ने काठमाडौं प्रहरी परिसरका प्रमुख एसएसपी दानबहादुर कार्कीले जानकारी दिएका छन् ।

यस नक्कली शरणार्थी प्रक्ररणमा अझै पनि एक दर्जन व्यक्तिहरू पक्राउ पर्नुपर्ने प्रारम्भिक अवस्थाको कुरामा देखिएको छ र अरू धेरै व्यक्तिहरू पनि थप अनुसन्धानको क्रममा कति पर्छन्, अहिले अनुसन्धान बिचबिचमै भएकाले अहिले नै भन्न नसकिने एसएसपी कार्कीले बताए ।

एसएसपी कार्कीका अनुसार यो प्रकरणमा अहिलेसम्म आठ जनालाई पक्राउ परिसकेका छन् । उनीहरूमाथि अनुसन्धान गरेको आज ४० औं दिन पुगेको छ ।

संगठित अपराधमा प्रहरीले ६० दिनसम्म हिरासतमा राखेर अनुसन्धान गर्न पाउँछ । प्रहरीले उनीहरूमाथि अनुसन्धान गर्न अझै २० दिन छ ।

नक्कली शरणार्थी काण्डमा प्रहरीमा २० वटा जाहेरी परेको थियो । जसमा एक सय भन्दा बढी पीडितको हस्ताक्षर रहेको एसएसपी कार्कीले बताए । पीडितको उजुरीमा २३ करोड २५ लाख रुपैयाँ ठगी भएको उल्लेख छ ।

प्रकाशित मिति: बिहीबार, वैशाख २१, २०८० १६:५७

प्रतिक्रिया दिनुहोस्