प्रधानमन्त्री ज्यू,टोपबहादुर रायमाझीलाई जोगाउन ओलीसँग कुनै मोलमोलाइ नगर्नुहोला: अजयबाबु शिवाकोटी

राजनीति

गृहपृष्ठ
राजनीति
प्रधानमन्त्री ज्यू,टोपबहादुर रायमाझीलाई जोगाउन ओलीसँग कुनै मोलमोलाइ नगर्नुहोला: अजयबाबु शिवाकोटी

प्रधानमन्त्री ज्यू,टोपबहादुर रायमाझीलाई जोगाउन ओलीसँग कुनै मोलमोलाइ नगर्नुहोला: अजयबाबु शिवाकोटी

शुक्रबार, वैशाख २२, २०८० बागेश्वरी पोस्ट

नेपालगन्ज । एमालेका सचिव एवं सांसद टोपबहादुर रायमाझी बेपत्ता भएको सम्बन्धमा नेपाली कांग्रेसका केन्द्रीय सदस्य अजयबाबु शिवाकोटीले प्रश्न उठाएका छन्। नक्कली भुटानी शरणार्थी बनाएर अमेरिका लैजाने भन्दै ठगी गर्ने गिरोहलाई सघाएको आरोपमा पक्राउ गर्ने पुर्जी जारी भएपछि रायमाझी एकाएक बेपत्ता भएका हुन्।

उनी अर्घाखाँचीमा भएका बेलामा पक्राउ पुर्जी जारी भएको थियो । अनि काठमाडौं आउन भनी उनी बुटवल आएका थिए । सभामुख देवराज घिमिरेसँग अर्घाखाँचीको कार्यक्रम सकेर बुटवल आइ बुधबार राति ९ बजेको फ्लाइटमा भैरहवाबाट काठमाडौं आउने भनेका रायमाझी काठमाडौं फर्केनन् ।

बुधबार रातिको यो घटनापछि रायमाझी एकाएक बेपत्ता भएका छन् । बिहीबार बिहान उनी पक्राउ परेको भनिए पनि पछि उनी पक्राउ नपरेको भनी रुपन्देही प्रहरी प्रमुखले जानकारी दिएका थिए ।

उनका छोरा सन्दीप भने बुधबार साँझ बुटवलमा पक्राउ परेका थिए । उनलाई बिहीबार काठमाडौं ल्याएर अदालतमा हाजिरी गराएपछि अनुसन्धानका लागि तीन दिनको म्याद थपिएको छ ।

सोही क्रममा प्रतिक्रिया दिँदै कांग्रेस केन्द्रीय सदस्य शिवाकोटीले रायमाझीलाई आकाशले निल्यो कि धर्तीले निल्यो रु भनी प्रश्न गरेका छन् । सामाजिक सञ्जाल फेसबुकमा स्टाटस लेख्दै शिवाकोटीले उपप्रधान तथा गृहमन्त्री नारायणकाजी श्रेष्ठ र प्रहरी महानिरीक्षक बसन्त कुँवरलाई रायमाझी जोगाउन लागेको कुनै आरोप नलागोस् भन्ने कामनासमेत गरेका छन् ।

रायमाझीलाई पक्राउ पुर्जी जारी भएपछि एमालेका अध्यक्ष केपी शर्मा ओलीसमेत प्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्डलाई भेट्न सिंहदरबार पुगेका थिए ।

यसबाट धेरै प्रश्न उब्जिएकोतर्फ ध्यानाकर्षण गर्दै शिवाकोटीले रायमाझीलाई जोगाउन कुनै मोलमोलाइ नहोस् भनी खवरदारीसमेत गराएका छन् ।

प्रहरी महानिरीक्षक बसन्त कुँवर पनि बिहीबार बुटवलकै कार्यक्रममा हुनु र उनकै अर्घाखाँचीका जिल्लावासी एवं सांसद रायमाझी एकाएक बेपत्ता हुनुले धेरै प्रश्न खडा भएको छ ।

यस्तो छ केन्द्रीय सदस्य शिवाकोटीको स्टाटस–

नक्कली भुटानी शरणार्थी बनाउने गिरोहका संरक्षक टोपबहादुर रायमाझी फरार भए कि फरार गराइयो रु नत्र अर्घाखाँचीबाट मिडियालाई प्रतिक्रिया दिएर भैरहवा पुगेका रायमाझीलाई आकाशले निल्यो की धर्तीले निल्यो रु गृहमन्त्री नारायणकाजी श्रेष्ठज्यू तपाईलाई माओवादीका पूर्व सहकर्मीलाई अनि प्रहरीको केन्द्रीय नेतृत्व बसन्तबहादुर कुँवरलाई जिल्लावासी जोगाउन खोजेको आरोप नलागोस् । प्रधानमन्त्री पुष्पकमल दाहालज्यू गिरोहका संरक्षक रायमाझीलाई जोगाउन एमाले अध्यक्ष केपी ओलीसँग कुनै मोलमोलाई नहोस्, नत्र खासमा गिरोहका संरक्षक तपाईहरु नै रहेको पुष्टि हुनेछ। त्यसैले पनि भ्रष्टाचारीको दलीय संलग्नता नहेरियोस्, जय नेपाल।

नक्कली भुटानी शरणार्थी बनाएर नेपालीलाई अमेरिका लैजाने गिरोह ठूलो रहेको बताइन्छ । अहिलेसम्म प्रहरीले आठ जनालाई मात्र नियन्त्रणमा लिएको छ ।

प्रकाशित मिति: शुक्रबार, वैशाख २२, २०८० १३:०९

प्रतिक्रिया दिनुहोस्