बाँकेमा अत्याधिक गर्मी बढ्यो

स्थानीय

गृहपृष्ठ
स्थानीय
बाँकेमा अत्याधिक गर्मी बढ्यो

बाँकेमा अत्याधिक गर्मी बढ्यो

सोमबार, वैशाख २५, २०८० बागेश्वरी पोस्ट

नेपालगन्ज। बाँकेमा अत्याधिक गर्मी बढेको छ । बाँकेमा तापमान ३२ डिग्री सेल्सियस पुग्दा यहाँको जनजीवन प्रभावित बनेको छ ।

प्रचण्ड गर्मीका कारण तापक्रम बढ्दै जाँदा तराई मधेशमा जनजीवन प्रभावित बनेको हो । नेपालगन्जको ३२ दशमलव ३ डिग्री सेल्सियस ताप मापन गरिएको जल तथा मौसम पूर्वानुमान महाशाखाले जनाएको छ ।

देशका तराई, मधेश तथा चुरे क्षेत्रमा तापक्रम बढ्दो क्रममा रहेकाले गर्मीका कारण हुनसक्ने असरबाट बच्न आवश्यक सतर्कता अपनाउन स्वास्थ्यकर्मीहरुले अनुरोध गरेका छन् ।

गर्मीका कारण बाँकेका स्थानीयवासीको दैनिकी प्रभावित बनेको छ । दिउँसोको समयमा बजार सुनसान देखिन थालेका छन् । मानिस मात्र नभई चराचुरुङ्गी र अन्य जनावर पानी एवं शीतल खोज्न थालेका छन् । बाँकेमा गर्मी बढ्दै जाँदा दैनिकरूपमा गरी खाने वर्गलाई समस्या पर्न थालेको छ ।

केही दिनअघिदेखि बढेको अत्यधिक गर्मीले जनजीवन अस्तव्यस्त भएको छ । वायुमण्डलीय तापक्रममा वृद्धिसँगै तातो हावा आउनुले सर्वसाधारणलाई घरबाहिर निस्कन समस्या भएको छ । अत्यधिक गर्मीले बजार, शैक्षिक संस्था, सरकारी कामकाज प्रभावित भएको छ ।

अहिले अत्यधिक गर्मीका कारण बच्चाको मुख सुक्ने, पानीको कमी हुनेलगायतको समस्या देखिएका कारण उनीहरूलाई झोलिलो पदार्थ खान दिन चिकित्सकहरु बताउँछन् ।

तातो हावाले वायु प्रदूषण हुने र यसले बालबालिका, वृद्धवृद्धा र बिरामीको श्वासप्रश्वासमा असर पुर्याउने चिकित्सकहरू बताउँछन् । यस्तो गर्मीमा अत्यावश्यक कामबाहेक घर बाहिर ननिस्कन, निस्कनुपरे छाता ओढेर हिँड्न र प्रशस्त पानी पिउनुपर्ने चिकित्सकको भनाई छ ।

प्रकाशित मिति: सोमबार, वैशाख २५, २०८० १६:०७

प्रतिक्रिया दिनुहोस्