फरार सांसद टोपबहादुर रायमाझी एमाले पार्टी सचिवबाट निलम्बित

राजनीति

गृहपृष्ठ
राजनीति
फरार सांसद टोपबहादुर रायमाझी एमाले पार्टी सचिवबाट निलम्बित

फरार सांसद टोपबहादुर रायमाझी एमाले पार्टी सचिवबाट निलम्बित

बुधबार, वैशाख २७, २०८० बागेश्वरी पोस्ट

नेपालगन्ज । नक्कली भुटानी शरणार्थी प्रकरणमा मुछिएर पक्राउ पुर्जी जारी भए पश्चात् फरार रहेका नेकपा एमालेका सचिव, सांसद एवं पूर्व उपप्रधानमन्त्री टोपबहादुर रायमाझी निलम्बित भएका छन् । उनलाई एमालेले पार्टी सचिवबाट आज निलम्बन गरेको हो ।

एमालेले एक विज्ञप्ति जारी गर्दै रायमाझीलाई पार्टीबाट निलम्बन गरेको जनाएको छ । मंगलबार भएको सचिवालय बैठकले रायमाझीलाई आत्मसमर्पण गर्न निर्देशन दिएको थियो । तर उनले अहिलेसम्म आत्मसमर्पण गरेका छैनन् ।

गत साता बुधबार गृहजिल्ला अर्घाखाँचीको कार्यक्रममा सहभागी भएर काठमाडौं आउने भनेर आउँदै गरेका रायमाझी भैरहवा आएर बेपत्ता भएका थिए । उनलाई प्रहरीले नियन्त्रणमा लिन खोज्दा आफैँ आत्मसमर्पण गर्न आउने बताएका थिए ।

तर, आफूलाई निर्दोष बताएर फरार भएपछि उनीमाथि विभिन्न आशंका उब्जिएको छ । यसअघि एमाले अध्यक्ष केपी शर्मा ओलीले दुई पटकम्म प्रधानमन्त्री पुष्पकमल दाहाल प्रचण्डलाई भेटेर रायमाझीलाई नियन्त्रणमा नलिन दबाब दिएका थिए ।

प्रहरीको प्रारम्भिक अनुसन्धानले उनलाई नेपाली नागरिकलाई नक्कली भुटानी शरणार्थी बनाउने योजनाका मुख्य योजनाकार मध्ये एक भएको निष्कर्ष निकालेको छ । रायमाझीका छोरा सन्दीप गत बिहीबार रुपन्देहीमा पक्राउ परेका थिए ।

कांग्रेस नेता एबं पूर्व गृहमन्त्री बालकृष्ण खाँणलाई प्रहरीले आज बिहान पक्राउ गरेपछि रायमाझीको विषयमा निर्णय लिन एमालेमाथि दबाब परेको हो ।

यसअघि एमालेले माओवादीबाट आएकाहरुलाई प्रचण्डले रिस पोखेको निष्कर्ष निकाल्दै पक्राउ नगर्न दबाब दिएको थियो ।

प्रचण्डले भने भ्रष्टाचारविरुद्ध यो ट्रेलर भएको भन्दै फिल्म देखाउन बाँकी रहेको बताउँदै आएका छन् । रायमाझीले आज साँझ वा भोलि बिहानसम्म आत्मसमर्पण गर्ने एमाले स्रोतले बताएको छ ।

प्रकाशित मिति: बुधबार, वैशाख २७, २०८० १४:२७

प्रतिक्रिया दिनुहोस्