बालकृष्ण खाणलाई निलम्बन गर्ने बारेमा दबाबमा देउवा

राजनीति

गृहपृष्ठ
राजनीति
बालकृष्ण खाणलाई निलम्बन गर्ने बारेमा दबाबमा देउवा

बालकृष्ण खाणलाई निलम्बन गर्ने बारेमा दबाबमा देउवा

बिहीबार, वैशाख २८, २०८० बागेश्वरी पोस्ट

नेपालगन्ज । नक्कली भुटानी शरणार्थी प्रकरणमा पूर्वगृहमन्त्री एवं पार्टीका केन्द्रीय सदस्य बालकृष्ण खाण पक्राउ परेपछि उत्पन्न परिस्थितिबारे छलफल गर्न कांग्रेसले पदाधिकारी बैठक बोलाइएको बताइएको छ।

बैठक कांग्रेस सभापति शेरबहादुर देउवा निवास धुम्बराहीस्थिति निजी निवासमा देउवाले दिउँसो २ बजे पदाधिकारी बैठक बोलाएका हुन्।

खाण पक्राउ परेलगत्तै देउवाले उनी निकटका कांग्रेस नेताहरूसँग छलफल गरेका थिए। छलफलका क्रममा देउवाले खाणमाथि लागिएको आरोपको वास्तविकता बुझ्ने प्रयास गरेका थिए।

त्यसपछि देउवाले शीर्ष नेताहरूसँग छलफल गरेका थिए। छलफलमा खाणलाई केन्द्रीय सदस्यबाट निलम्बन गर्ने विषयले प्रवेश पाएको थियो।

नक्कली भुटानी शरणार्थी प्रकरणमा मुछिएपछि कतिपय नेताले खाणलाई केन्द्रीय सदस्यबाट निलम्बन गर्नुपर्ने सुझाव राख्दा सहमहामन्त्री महेन्द्र यादवलगायतका नेता भने बचाउमा उभिएका थिए।

महामन्त्रीद्वय गगन थापा र विश्वप्रकाश शर्मालगायतका नेताहरू खाणलाई निलम्बन गर्नुपर्ने पक्षमा छन्।यद्यपि बुधबारको बैठकमा छलफल भए पनि निर्णय हुन सकेको थिएन।

आज पदाधिकारी र पूर्वपदाधिकारीसहितको बैठक बसेर निर्णय गर्ने भनेर देउवा बैठक स्थगित गरेका थिए।खाणको निलम्बनका विषयमा आज बस्ने बैठकले निर्णय गर्ने बताइएको छ।

नेपाली नागरिकलाई नक्कली भुटानी शरणार्थी बनाएर अमेरिका पठाउने गिरोहसँग लेनदेनमा संलग्न भएको आरोपमा खाणलाई बुधबार चाबहिलस्थित मैजुबहाल निवासबाट प्रहरीले पक्राउ गरेको थियो।

उनीमाथि अनुसन्धान गर्न जिल्ला अदालत काठमाडौंले चार दिनको म्याद दिएको छ। भुटानी शरणार्थी प्रकरणमै मुछिएका पूर्वऊर्जामन्त्री एवं पार्टी सचिव टोपबहादुर रायमाझीलाई नेकपा एमालेले निलम्बन गरिसकेको छ।

मंगलबार बसेको एमाले सचिवालय बैठकले यससम्बन्धी अनुसन्धान र कानुनी कारबाही प्रक्रियाको अन्तिम टुंगो नलागेसम्म रायमाझीलाई पदबाट निलम्बन गर्ने निर्णय गरेको छ।

प्रहरी अनुसन्धानमा सहयोग पु¥याउने उद्देश्यले रायमाझीलाई पार्टीको सचिव पदबा निलम्बन गरिएको एमालेले बताएको छ।

समान प्रकरणमा मुछिएका रायमाझीलाई एमालेले पदबाट निलम्बन गरिसकेपछि खाणलाई पनि केन्द्रीय सदस्यबाट निलम्बन गर्नुपर्ने दबाबमा सभापति देउवा छन्।

बुधबार बसेको पदाधिकारी बैठकमा पनि कतिपय नेताले अनुसन्धानलाई सहज बनाउन खाणलाई केन्द्रीय सदस्यबाट निलम्बन गर्नुपर्ने सुझाव देउवालाई दिएका थिए।

प्रकाशित मिति: बिहीबार, वैशाख २८, २०८० १२:०५