पक्राउ परेका टोपबहादुर रायमाझीलाई आज अदालत पेश गरिंदै

सुरक्षा-अपराध

गृहपृष्ठ
सुरक्षा-अपराध
पक्राउ परेका टोपबहादुर रायमाझीलाई आज अदालत पेश गरिंदै

पक्राउ परेका टोपबहादुर रायमाझीलाई आज अदालत पेश गरिंदै

सोमबार, जेठ १, २०८० बागेश्वरी पोस्ट

नेपालगन्ज । नक्कली भुटानी शरणार्थी प्रकरणमा हिजो साँझ काठमाडौंबाट पक्राउ परेका पूर्व उपप्रधानमन्त्री एवम् नेकपा एमालेका निलम्बित सचिव टोपबहादुर रायमाझीलाई आज अदालतमा पेश गरिने भएको छ ।

नक्कली भुटानी शरणार्थी प्रकरणमा मुछिएका रायमाझी माथि प्रहरीले अनुसन्धानका लागि म्याद थप गर्न आज काठमाडौं जिल्ला अदालतमा लग्ने भएको हो । आज काठमाडौं जिल्ला अदालतमा उपस्थित गराई प्रहरीले अनुसन्धानका लागि म्याद लिन लागेको हो ।

पूर्व उपप्रधानमन्त्री समेत रहेका रायमाझी काठमाडौँको बुढानीलकण्ठ क्षेत्रबाट हिजो साँझ पक्राउ परेका थिए । रायमाझीलाई काठमाडौं प्रहरी परिसरमा राखिएको छ ।

उनी विरुद्ध जिल्ला अदालत काठमाडौँले यही वैशाख २० गते पक्राउ पुर्जी जारी गरेको थियो । पक्राउ पुर्जी जारी भएदेखि नै रायमाझी फरार रहेका थिए । सोही प्रकरणमा पूर्व गृहमन्त्री बालकृष्ण खाँडलाई प्रहरीले पक्राउ गरिसकेको छ ।

शनिबार राति काठमाडौं छिरेको सूचना पाएको प्रहरीले आइतबार साँझ उनलाई बूढानीलकण्ठको पासीकोटबाट नियन्त्रणमा लिइएको हो । रायमाझीको खोजी गर्न नेपाल–भारत सीमा क्षेत्रमा पुगेको टोलीले पनि कुनै सुराक फेला पारेको थिएन ।

यो प्रकरणमा रायमाझीसहित अहिलेसम्म १३ जना पक्राउ परेका छन् । कांग्रेसका नेता तथा पूर्वगृहमन्त्री बालकृष्ण खाँड, उनका सहयोगी नरेन्द्र केसी, काठमाडौंको टोखाका रामशरण केसी र मोरङका गोविन्द चौधरी पक्राउ परेका छन् ।

यस्तै रायमाझीका छोरा सन्दीप, सरकारका सचिव टेकनारायण पाण्डे, एमाले नेता तथा तत्कालीन गृहमन्त्री रामबहादुर थापा बादलका सुरक्षा सल्लाहकार इन्द्रजित राई, ललितपुर महानगरपालिका–२३ घर भएका ५० वर्षीय सानु भण्डारी, मोरङको पथरी शनिश्चरे नगरपालिका–१० घर भएका ४९ वर्षीय केशवप्रसाद दुलाल, पाँचथरको फिदिम नगरपालिका–७ घर भएका ४५ वर्षीय टंककुमार गुरुङ, दाङ घर भएका सन्देश शर्मा, मोरङको पथरी शनिश्चरे नगरपालिका–१० का पूर्व वडाध्यक्ष सागर राई गरी १२ जना अहिले हिरासतमा छन् ।

सो प्रकरणमा मुछिएर पक्राउ पूर्जी जारी भएका तीन जना अझै फरार रहेका छन् । इन्द्रजित राईका छोरा निरज, कांग्रेस नेता आङटावा शेर्पा, रामबहादुर थापा बादलका छोरा प्रतिक थापा फरार भएका हुन् ।

प्रकाशित मिति: सोमबार, जेठ १, २०८० ०९:२३

प्रतिक्रिया दिनुहोस्