रेशम चौधरीलाई आममाफी दिन मन्त्रिपरिषद्को सिफारिस

राजनीति

गृहपृष्ठ
राजनीति
रेशम चौधरीलाई आममाफी दिन मन्त्रिपरिषद्को सिफारिस

रेशम चौधरीलाई आममाफी दिन मन्त्रिपरिषद्को सिफारिस

आइतबार, जेठ १४, २०८० बागेश्वरी पोस्ट

फाइल फोटो

नेपालगन्ज । नेपाल प्रहरीका एसएसपीसहित आधा दर्जन बढीको हत्या भएको टीकापुर घटनामा जन्मकैदको सजाय भएका रेशम चौधरीलाई सरकारले आममाफी दिन सिफारिस गरेको छ ।

आज बिहान सिंहदरबारमा बसेको मन्त्रिपरिषद् बैठकबाट चौधरीलाई आममाफी दिन राष्ट्रपतिसमक्ष सिफारिस गर्ने निर्णय गरेको सरकारकी प्रवक्ता रेखा शर्माले जानकारी दिइन् ।

मन्त्रिपरिषद्को सिफारिस अनुसार गणतन्त्र दिवसका अवसरमा राष्ट्रपति रामचन्द्र पौडेलले भोलि चौधरीलाई आममाफी दिनेछन् ।

यसअघि सरकारले चौधरीलाई माफी दिने प्रस्तावबारे राय माग गर्दै राष्ट्रपति कार्यालयमा निवेदन पठाएको थियो । उक्त निवेदन अध्ययन गरी राष्ट्रपति कार्यालयले प्रचलित कानुन, यस सम्बन्धमा अदालतबाट भएको फैसला र सर्वोच्च अदालतबाट प्रतिपादित सिद्धान्त विपरीत नहुने गरी कानुन बमोजिम हुने गरी गर्नु भनेर गृहमा फिर्ता पठाइएको थियो ।

गृहले चौधरीबारे मन्त्रिपरिषदमा प्रस्ताव लगेपछि आममाफीका लागि मन्त्रिपरिषदले सिफारिस गरेको हो ।

२०७२ भदौ ७ गते टीकापुरमा भएको प्रदर्शनले हिंसात्मक रूप लिँदा ८ जना प्रहरी र १ जना दूधे बालकको ज्यान गएको थियो ।

घटनामा प्रहरी वरिष्ठ उपरीक्षक लक्ष्मण न्यौपाने, प्रहरी निरीक्षकद्वय बलराम विष्ट र केशव बोहरा, हवल्दार श्यामबहादुर खड्का, प्रहरी जवान लोकेन्द्रबहादुर चन्द, सशस्त्र प्रहरीका वरिष्ठ हवल्दार ललित साउद, सहायक हवल्दार रामबिहारी चौधरी र प्रहरी जवान जनक नेगी मारिएका थिए ।

प्रकाशित मिति: आइतबार, जेठ १४, २०८० ११:४८

प्रतिक्रिया दिनुहोस्