दुई नाबालक छोरासहित आमाले विष खाइन्, १८ महिने छोराको मृत्यु

सुरक्षा-अपराध

गृहपृष्ठ
सुरक्षा-अपराध
दुई नाबालक छोरासहित आमाले विष खाइन्, १८ महिने छोराको मृत्यु

दुई नाबालक छोरासहित आमाले विष खाइन्, १८ महिने छोराको मृत्यु

आमा र अर्का छोराको अवस्था गम्भीर

बिहीबार, जेठ १८, २०८० बागेश्वरी पोस्ट

नेपालगन्ज । एक जना महिलाले आफ्नै दुई छोरासहित विष सेवन गर्दै आत्महत्याको प्रयास गरेकी छिन् । विष सेवनबाट एक नाबालकको मृत्यु भएको छ ।

मकवानपुरको हेटौंडा उपमहानगरपालिका-१५ जाँतेकी ३६ वर्षीया सोनी पाख्रिनले गएराती ७ वर्षीय छोरा अस्किन र १८ महिने छोरा जेनिस वाइबालाई विष खुवाएर आफूले पनि विष सेवन गरेको प्रहरीले जानकारी दिएको छ ।

जिल्ला प्रहरी कार्यालय मकवानपुरका अनुसार पाख्रिनले प्यारा क्वाइट डाइक्लोराइड नामक झार मार्ने विषादी आफूसहित बच्चालाई खुवाएको खुलेको छ ।

विष सेवन गरेकी उनीसहित बालकहरूलाई उपचारका लागि हिजो राती नै हेटौडा अस्पताल पुर्‍याइएको थियो । त्यहाँबाट उनीहरूलाई राति साढे ८ बजे चितवनको भरतपुर रिफर गरिएको थियो ।

गम्भीर रहेका नाबालक छोरा जेनिसको आज बिहान ७ः५० मा उपचारका क्रममा चितवन मेडिकल कलेजमा मृत्यु भएको जिल्ला प्रहरी कार्यालय मकवानपुरले जानकारी दिएको छ ।

प्रहरीका अनुसार आमा र अर्का छोरा अस्किनको अवस्था पनि गम्भीर छ । उनीहरू दुवै जनाको आईसीयू कक्षमा उपचार भइरहेको छ ।

प्रारम्भिक घटना विवरण अनुसार आमाले नै बच्चालाई विषादी खुवाएर आफूले पनि खाएको पाइएको प्रहरीले जनाएको छ । तर, यो अवस्था किन आयो भन्ने नखुलेको उनले बताए । घटना बारे अनुसन्धान भइरहेको मकवानपुर प्रहरीले जानकारी दिएको छ ।

प्रकाशित मिति: बिहीबार, जेठ १८, २०८० १०:३१

प्रतिक्रिया दिनुहोस्