संयुक्त सहकार्य गरेर अगाडि नगए नागरिक तहमा पुग्न सकिन्न : अजयबाबु शिवाकोटी

राजनीति

गृहपृष्ठ
राजनीति
संयुक्त सहकार्य गरेर अगाडि नगए नागरिक तहमा पुग्न सकिन्न : अजयबाबु शिवाकोटी

संयुक्त सहकार्य गरेर अगाडि नगए नागरिक तहमा पुग्न सकिन्न : अजयबाबु शिवाकोटी

बिहीबार, जेठ १८, २०८० बागेश्वरी पोस्ट

नेपालगन्ज । संयुक्त सहकार्य गरेर अब अगाडि नगएसम्म देशभरका नागरिक तहमा पुग्न नसकिने नेपाली कांग्रेसका केन्द्रीय सदस्य अजयबाबु शिवाकोटीले बताएका छन् ।

ट्रेड युनियन कांग्रेस अन्तर्गतको युनिप्रेसले राजधानीमा आयोजना गरेको ‘आजको राजनीतिक अवस्था र ट्रेड युनियन’ नामक विचार गोष्ठीमा बोल्दै केन्द्रीय सदस्य शिवाकोटीले ट्रेड युनियनका पदाधिकारीहरुलाई संयुक्त सहकार्य गरेर जनताका घरघरमा पुग्न आग्रह गरेका हुन् ।

उनले देशहितका लागि महामन्त्री गगनकुमार थापाले पदलाई दाउमा राखेर भए पनि अगाडि बढ्ने उद्घोष गरिरहँदा आफूहरु सबैले देश बनाउनका लागि कांग्रेसभित्र रुपान्तरण जरुरी रहेको बताए ।

उनले पार्टीमा वेथितिले चरमसीमा नाघेको संकेत गर्दै नेता कार्यकर्ता र समर्थकको भावना विपरीत चुनावपूर्व गठबन्धन गरेर केही सीमित व्यक्तिले पटक पटक लाभ लिएको र अरु हेरेको हेर्यै भएको चर्चा गर्दै यो गलत प्रवृत्तिविरुद्ध लड्नु पर्ने बताए ।

शिवाकोटीले २०८४ सालको चुनावअघि पार्टीमा धेरै उथलपुथल गर्नुपर्ने भन्दै के हामी यसमा तयार छौँ ? भन्दै उपस्थित समुदायलाई प्रश्न गरेका थिए ।

पार्टी नेतृत्व विधि र विधान विपरीत चलेको, सरकारमा रहेकाहरु जनभावना विपरीत चलेको भन्दै उनले आक्रोश पोखे ।

त्यस्तै टीकापुर हत्याकाण्डमा नेतृत्व गम्भीर बन्न नसकेको, भष्टाचारमा शून्य सदनशीलता अपनाउन नसकेको, नक्कली भुटानी शरणार्थी प्रकरणमा पार्टीको स्पष्ट धारणा नआएको भन्दै दुःख व्यक्त गरे ।

उनले सांसदको भनाई रेकर्डबाट हटाउन लाग्नु ठूलो भुल भएको भन्दै उनले राजाको ठाउँमा अनेक राजा भन्ने भाष्य स्थापित गराउन तीन दलका नेताहरु आफैँ लागेको उल्लेख गरे ।

उनले ‘तीन दलका तीन नेता के राजपरिवारका सदस्य हुन्?’ भनी प्रश्न गर्दै उनीहरुको आचरणमा प्रश्न गर्न किन नपाइने ?’ भने । नयाँ दल राष्ट्रिय स्वतन्त्र पार्टीसमेत चुप बसेको देख्दा आश्चर्यमा परेको उनले बताए ।

प्रकाशित मिति: बिहीबार, जेठ १८, २०८० १६:००

प्रतिक्रिया दिनुहोस्