रहस्यमय दरबार हत्याकाण्डको आज २२ वर्ष

सुरक्षा-अपराध

गृहपृष्ठ
सुरक्षा-अपराध
रहस्यमय दरबार हत्याकाण्डको आज २२ वर्ष

रहस्यमय दरबार हत्याकाण्डको आज २२ वर्ष

शुक्रबार, जेठ १९, २०८० बागेश्वरी पोस्ट

नेपालगन्ज । दरबार हत्याकाण्ड भएको आज २२ वर्ष पुगेको छ । आजकै दिन २०५८ जेठ १९ गते तत्कालीन राजा वीरेन्द्रको वंशनाश भएको थियो ।

२०५८ जेठ १९ गते विश्वमा नै चर्चित भनेको दरबार हत्याकाण्ड का रूपले चिनिन्छ । राज्यको भौगोलिक अवस्थालाई हेरेर प्रशासनिक क्षेत्रको सुधारमा महत्त्वपूर्ण भूमिका निर्वाह गरेका वीरेन्द्रको पारिवारिक जमघटकै सयमा रहस्यमय हत्या भएको कहालीलाग्दो घटनाक्रम मानिन्छ ।

दरबार हत्याकाण्डमा राजा वीरेन्द्रसहित शाही परिवारका ९ जनाको हत्या भएको थियो । घटनामा राजा वीरेन्द्र, रानी ऐश्वर्य, युवराज दीपेन्द्र, अधिराजकुमारी श्रुति, अधिराजकुमार नीराजन वीर विक्रम शाह, काका धीरेन्द्र शाह, काकी शान्ति, श्रद्धा, जयन्ती र श्रद्धाका पति कुमार खड्ग विक्रम शाहको हत्या भएको थियो।

दरबार हत्याकाण्डको २२ वर्ष बित्दा समेत छानबिन हुन सकेको छैन । तत्कालीन सभामुख तारानाथ रानाभाटको संयोजकत्वमा छानबिन समिति गठन भए पनि हाल सम्म कुनै तथ्य बाहिर आएको छैन । हत्याबारे अनेक अड्कलबाजी भए पनि तथ्य बाहिर आउन सकेको छैन । तत्कालीन युवराज दीपेन्द्रले हत्या गरेको भन्ने कुरा छानबिनपछि बनाइएको प्रतिवेदनले जनाए पनि त्यसमा अझै ठूलो जनसमूहलाई आशंका रहेको छ ।

समितिका अनुसार सो रात राजदरबारमा रात्रीभोज चलिरहेको थियो । राजा वीरेन्द्र, रानी ऐश्वर्या लगायत राजपरिवारका एक दर्जन भन्दा बढी व्यक्तिको उपस्थिति थियो । सो रात्रीभोजका आयोजक राजकुमार दीपेन्द्र राति ८ बजे हलमा आएका थिए । उनी पूर्ण सैन्य पोशाकमा थिए । उनको एक हातमा आधुनिक मेसिनगन र कोल्ट राइफल थियो । उनको वर्दीमा ९ एमएमको पेस्तोल राखिएको थियो । दीपेन्द्रले बुबा राजा वीरेन्द्रलाई हेरेर दाहिने हातमा समातेको मेसिनगनको ट्रिगर थिचे । त्यसपछि केही मिनेटमै त्यहाँ उपस्थित शाही परिवारका ९ जनाको हत्या भयो । अन्त्यमा राजकुमार दीपेन्द्रले आफैंलाई पनि गोली हाने ।

वीरेन्द्रका दुई भाइ मध्ये ज्ञानेन्द्र मात्रै बाँकी छन् । धिरेन्द्र शाहको समेत वीरेन्द्रको परिवारसँगै हत्या भएको थियो । वीरेन्द्र दशौं शाहवंशीय राजा थिए । उनले विक्रम संवत् २०२८ माघ १७ गते सोमबार शासन सत्ता सम्हालेका थिए । यता वीरेन्द्रको हत्यापछि ज्ञानेन्द्रले गद्दी सम्हाले । त्यसपछि उनीमाथि दरबार हत्याकाण्ड रचाएको भन्ने हल्ला पनि चलेको थियो ।

गणतन्त्र आएसँगै पूर्वराजा ज्ञानेन्द्र शाहले आफू दरबार हत्याकाण्डको छानबिन गर्न सहयोग गर्ने भन्दै राजदरबारबाट बाहिरिएका थिए ।

प्रधानमन्त्री भएको बेलामा स्व. गिरिजाप्रसाद कोइराला, पुष्पकमल दाहाल, माधवकुमार नेपाल लगायतले दरबार हत्याकाण्डको छानबिन गरेरै छाड्ने प्रतिबद्धता जनाएको पनि वर्षौ भइसकेको छ । हालै प्रधानमन्त्री पुष्पकमल प्रचण्डले दरबार हत्याकाण्डको अनुसन्धान गरी निष्कर्षमा पुर्‍याउने बताएका छन् । तर, अनुसन्धान हुनेमा शंका नै छ ।

प्रकाशित मिति: शुक्रबार, जेठ १९, २०८० ११:४५

प्रतिक्रिया दिनुहोस्