सहकारीहरुले वित्तीय साक्षरता कक्षा सञ्चालन गर्नुपर्नेमा जोड

स्थानीय

गृहपृष्ठ
स्थानीय
सहकारीहरुले वित्तीय साक्षरता कक्षा सञ्चालन गर्नुपर्नेमा जोड

सहकारीहरुले वित्तीय साक्षरता कक्षा सञ्चालन गर्नुपर्नेमा जोड

शुक्रबार, जेठ २६, २०८० बागेश्वरी पोस्ट

नेपालगञ्ज । जिल्ला सहकारी संघ बाँकेका अध्यक्ष प्रेम सुवेदीले सहकारीहरुले वित्तीय साक्षरता कक्षा सञ्चालन गर्नुपर्नेमा जोड दिएका छन् ।

नेपालगञ्ज उपमहानगरपालिका सहकारी शाखाले आज आयोजना गरेको आफ्नो नियमन क्षेत्रभित्रका सहकारी संस्थाहरुमा सम्पत्ति शुद्धिकरण निवारण कार्यान्वयन विषयक अभिमुखीकरण कार्यक्रमको समापन गर्दै उनले वित्तीय साक्षरता कक्षालाई प्रभावकारी ढंगले सञ्चालन गरे मात्र सहकारीप्रतिको विश्वास र भरोसा बढ्ने बताए । उनले पछिल्लो समय धमिलिएको सहकारीहरुको छवि उजिल्याउन बचतकर्ताहरुको विश्वास जित्ने गरी काम गर्नुपर्ने बताए ।

No description available.

नेपालगञ्ज उपमहानगरपालिका आर्थिक विकास समिति संयोजक गोपाल पुनले सहकारीहरु योजनाबद्ध ढंगले संचालन हुनुपर्ने बताए । आमजनताको विश्वास जितेर काम गर्नुपर्ने चुनौती सहकारीहरुसामु रहेको भन्दै उनले नेपालगञ्ज उपमहानगरपालिका आफ्नो नियमन क्षेत्रभित्रका सहकारीहरुलाई उन्नत र सुव्यवस्थित बनाउन सहकार्य र समन्वयमा प्रतिबद्ध रहेको बताए ।

सहकारी शाखा प्रमुख प्रबिणकुमार रानाले सहकारीहरुले पछिल्लो समय आफ्नो गुम्दै गरेको शाख र विश्वास फर्काउन जिम्मेवारीबोधका साथ प्रस्तुत हुनुपर्ने अवस्था आएको बताए । सहकारीहरुलाई परेका अप्ठेराहरुमा सहकारी शाखा संगसंगै रहने बताउँदै उनले सच्चिने मौका सबैले पाउने बताए । तर, पटक पटक गल्ती दोहार्याउने छुट कसैलाई नभएको उनको भनाई छ ।

समापन कार्यक्रममा अभिमुखीकरण कार्यक्रमका प्रशिक्षक एवम् राष्ट्रिय सहकारी महासंघका सञ्चार अधिकृत रामसुदन तिमिल्सिना, जिल्ला कृषि सहकारी संघका सचिव लोकेन्द्र चन्द, जिल्ला सहकारी संघका प्रबन्ध सञ्चालक नवराज उपाध्याय, सहभागीका तर्फबाट शारदा उपभोक्ता सहकारी संस्थाकी व्यवस्थापक रुपा पन्थी, शुद्ध गोरस दुग्ध उत्पादक सहकारी संस्थाका अध्यक्ष खगेन्द्रप्रसाद न्यौपाने लगायतले बोलेका थिए । अभिमुखीकरण समापन कार्यक्रममा राष्ट्रिय सहकारी संघका सञ्चालक सदस्य विजया धिताल समेत उपस्थित थिइन् । अभिमुखीकरणमा झण्डै तीन दर्जन सहकारीका अध्यक्ष/व्यवस्थापक सहभागी थिए ।

No description available.