नागरिक उड्डयन प्राधिकरणले बालेनलाई सोध्यो स्पष्टीकरण

राजनीति

गृहपृष्ठ
राजनीति
नागरिक उड्डयन प्राधिकरणले बालेनलाई सोध्यो स्पष्टीकरण

नागरिक उड्डयन प्राधिकरणले बालेनलाई सोध्यो स्पष्टीकरण

शुक्रबार, असार १, २०८० बागेश्वरी पोस्ट

काठमाडौं । काठमाडौं महानगरपालिकाका मेयर बालेन्द्र साह (बालेन) सहित तीन जनालाई नेपाल नागरिक उड्डयन प्राधिकरणले स्पष्टीकरण सोधेको छ ।

सिनामंगलस्थित त्रिभुवन अन्तर्राष्ट्रिय विमानस्थल क्षेत्रमा पूर्व जानकारी र सूचना नदिइ तार काटेको विषयमा प्राधिकरणले स्पष्टीकरण सोधेको हो ।

महानगरको वडा नम्बर ९ मा पर्ने प्राधिकरणको विमानस्थल क्षेत्रसँग सम्बन्धित क्षेत्रमा बिहीबार महानगरले नगर प्रहरीसहितको टोली पठाइ फेन्सिङ तार काटेको थियो ।

यसै विषयमा प्राधिकरणका महानिर्देशक प्रदीप अधिकारीले महानगर प्रमुखसहितलाई स्पष्टीकरण सोध्ने निर्णय गरेका हुन् ।

प्राधिकरणले यो कार्यलाई कानुनविपरित भनेको छ ।

‘प्राधिकरणका कर्मचारीले फेन्सिङ तार नकाट्न अनुरोध गर्दा पनि अटेर गरी जबरजस्ती कार्य गरेको, सोसम्बन्धी पत्र तथा जानकारी माग्दा नगर प्रमुखको आदेशबमोजिम कार्य गरेको र त्यहीँ सोध्न जानुस् भनी जवाफ दिएकाले सो कार्यमा तपाईं (मेयर) को संलग्तना देखिएकाले प्राधिकरणको ऐनको दफा ७ को कसुरमा ७ दिनभित्र लिखित स्पष्टीकरण पेस गर्नु,’ प्राधिकरणले मेयर साहलाई शुक्रबार लेखेको पत्रमा उल्लेख गरिएको छ ।

यो विषयमा चित्तबुझ्दो जवाफ नदिए मेयर साहसहित संलग्नहरूलाई कानुनी कारबाहीको बाटोमा लैजानुका साथै विमानस्थल प्रवेशमा प्रतिबन्ध लगाउन सकिने प्राधिकरण स्रोतले बताएको छ ।

प्राधिकरणले यसै विषयमा महानगरका नगर प्रहरी प्रमुख राजुनाथ पाण्डे र वडा नम्बर ९ का वडा अध्यक्ष रामजी भण्डारी पनि सात दिनभित्र लिखित स्पष्टीकरण बुझाउन भनेको छ ।

यो कानुन उल्लंघन भएको पुष्टि भएमा ५० हजार जरिवाना र जरिवाना नतिरेमा उडानमा प्रतिबन्ध लगाउन सकिने प्राधिकरणको कानुनमा व्यवस्था रहेको छ ।