आगामी योजनाबारे छलफल गर्दै नेपालगञ्ज १० को वडा भेला सम्पन्न

स्थानीय

गृहपृष्ठ
स्थानीय
आगामी योजनाबारे छलफल गर्दै नेपालगञ्ज १० को वडा भेला सम्पन्न

आगामी योजनाबारे छलफल गर्दै नेपालगञ्ज १० को वडा भेला सम्पन्न

शुक्रबार, असार १, २०८० बागेश्वरी पोस्ट

नेपालगञ्ज । नेपालगञ्ज उपमहानगरपालिका वडा नम्बर १० को वडा भेला आज सम्पन्न भएको छ । आर्थिक वर्ष २०८०/०८१ को लागि प्रस्तावित योजना, कार्य संकलनका लागि भेला आयोजना गरिएको थियो । भेला नेपालगञ्ज गणेशमान चोकस्थित साथी कृष्ण कटेजमा सञ्चालन गरिएको थियो ।

भेलामा बोल्दै नेपालगञ्ज उपमहानगरपालिका वडा नम्बर १० का अध्यक्ष श्रवणकुमार श्रेष्ठले वडाबासीको अपेक्षा धेरै, बजेट कम भएपनि समग्र विकासका लागि हरसम्भव प्रयास भइरहेको दाबी गरे । उनले वडा कार्यालयको क्षमता र स्थानीय माग अनुसार नै योजनाका काम सम्पन्न गर्ने विश्वास पनि दिलाए । वडा सदस्य दिपेन्द्रराज श्रेष्ठले आर्थिक वर्ष २०७९/०८० मा सम्पन्न भएका पूर्वाधार योजनाको बारेमा जानकारी दिँदै आगामी योजनाबारे पनि प्रकाश पारेका थिए ।

No description available.

वडा सदस्य भरतध्वज शाहीले सहभागीका तर्फबाट उठाइएका जिज्ञासा हल गर्ने प्रयास गर्ने प्रयास गरेका थिए । वडा सदस्य विना थापा मगरले स्वागत मन्तव्य व्यक्त गरेको कार्यक्रमको सञ्चालन वडा सचिव शान्ति केसी गरेकी थिइन् । आर्थिक वर्ष २०८०/०८१ को लागि प्रस्तावित कार्य योजना संकलनका लागि वडाभित्रका टोल विकास संस्था, विद्यालय, क्लब, विभिन्न संघसंस्था र वडाबासीहरुले आफ्नो योजना लिखित तथा मौखिकरुपमा पेश गरेका थिए ।

बिशेष गरेर सडक निर्माण , ग्रावेल, नाला व्यवस्थापन, स्वास्थ्य, सरसफाई, वत्ती, खानेपानी, युवा, महिला तथा बालबालिकाका लागि कार्यक्रम, व्यवसायिक दक्षताका लागि विभिन्न तालिम आदि विषयमा बजेट माग गरिएको छ । नेपालगञ्ज उपमहानगरपालिका वडा नम्बर १० मा १ करोड ३१ लाख ८७ हजारको बजेट सिलिङ नेपालगञ्ज उपमहानगरपालिकाबाट प्राप्त भएको छ । कार्यक्रममा वडा सदस्यहरू, जेष्ठ नागरिक, बाल अधिकारकर्मी, समाजसेवी लगायतको सहभागिता रहेको थियो ।

प्रकाशित मिति: शुक्रबार, असार १, २०८० २१:३२

प्रतिक्रिया दिनुहोस्