राप्तीसोनारीको करिब ८१ करोड बजेट सर्वसम्मत पारित

स्थानीय

गृहपृष्ठ
स्थानीय
राप्तीसोनारीको करिब ८१ करोड बजेट सर्वसम्मत पारित

राप्तीसोनारीको करिब ८१ करोड बजेट सर्वसम्मत पारित

आइतबार, असार १७, २०८० बागेश्वरी पोस्ट

राप्तीसोनारी (बाँके) । राप्तीसोनारी गाउँपालिकाको आगामी आर्थिक बर्ष २०८०/८१ को बजेट सर्वसम्मतले पारित भएको छ । गाउँसभाको १३औं अधिवेशनको दोस्रो बैठकले आज सर्वसम्मतले बजेट पारित गरेको हो । राप्तीसोनारीले करिब ८१ करोड रुपैयाँ बराबरको बजेट गाउँसभामा प्रस्तुत गरेको थियो । राप्तीसोनारी गाउँपालिकाकी उपाध्यक्ष मनिषासिंह थारुले असार १० गते पहिलो बैठकमा ८० करोड ९१ लाख २८ हजार रुपैयाँको बजेट गाउँसभाको १३औं अधिवेशनमा प्रस्तुत गरेकी थिइन् । त्यसअघि अध्यक्ष तप्तबहादुर पौडेलले प्रस्तुत गरेको नीति तथा कार्यक्रम त्यसै दिन सर्वसम्मतले पारित भएको थियो ।

गाउँपालिकाले आगामी वर्षका लागि चालूतर्फ ६३ करोड ६ लाख २८ हजार र पूँजीगततर्फ १७ करोड ५८ लाख गरी कूल ८० करोड ९१ लाख २८ हजार रुपैयाँको बजेट ल्याएको हो । राप्तीसोनारीले आगामी वर्षका लागि शिक्षातर्फ उल्लेखनीय बजेट विनियोजना गरेको छ । शिक्षाका लागि मात्रै ३५ करोड ९ लाख ३० हजार रुपैयाँ विनियोजना गरिएको हो । यस्तै स्वास्थ्यमा ७ करोड ३९ लाख १७ हजार विनियोजन गरिएको प्रमुख प्रशासकीय अधिकृत ओमप्रकाश देवकोटाले बताए । गाउँपालिकाले पूर्वाधार विकास, शिक्षा, स्वास्थ्य, कृषि, पशु विकास, पर्यटन, सामाजिक विकास लगायतलाई जोड दिएको अध्यक्ष पौडेलले बताए ।

कार्यपालिका सदस्यहरु लक्ष्मी थारु, कमला विक र मंगल वलीले शून्य समयमा बोलेका थिए । लेखा समिति संयोजक केशवराज दमाईले लेखा प्रतिबेदन प्रस्तुत गरेका थिए भने विधायन समिति संयोजक रामलखन थारुले विधायन समितिको प्रतिवेदन २०७९/८० प्रस्तुत गरेका थिए । यी दुबै प्रतिबेदन पनि सर्वसम्मत पारित भएको छ । उपाध्यक्ष थारुले असार १० गते गाउँसभामा प्रस्तुत गरेको न्यायिक समितिको प्रतिवेदन पनि पारित भएको छ । गाउँसभामा उपाध्यक्ष थारु, वडा नम्बर १ का वडा अध्यक्ष यमबहादुर खड्का, वडा नम्बर ३ का वडा अध्यक्ष मिनकुमार थारु, वडा नम्बर ४ का वडा अध्यक्ष मिनराज खड्का, वडा नम्बर ५ का वडा अध्यक्ष झगरु थारु, वडा नम्बर ६ का वडा अध्यक्ष लवराज खरेल, वडा नम्बर ७ का अध्यक्ष रामलखन थारु, ८ का अध्यक्ष शालिकराम डाँगी र ९ का अध्यक्ष सोहनलाल चौधरीले बोलेका थिए ।