प्रधानमन्त्रीको राजिनामा माग्दै एमालेले गर्यो राष्ट्रियसभा बैठक अवरुद्ध

राजनीति

बिहीबार, असार २१, २०८० बागेश्वरी पोस्ट

फाइल फोटो

काठमाडौँ । नेकपा एमालेले आज दिउँसो १ बजे शुरु भएको राष्ट्रिय सभाको बैठक अवरुद्ध पारेको छ ।

बैठकमा प्रधानमन्त्री पुष्पकमल दाहाल प्रचण्डले राजीनामा नदिएसम्म सदन चल्न नदिने भन्दै एमाले सांसदहरुले बैठक अवरुद्ध पारेका हुन् ।

प्रधानमन्त्री प्रचण्डले गत सोमबार एक कार्यक्रममा प्रधानमन्त्री बन्न दिल्ली जानुपर्छ भन्ने आसयको भनाइ राखेको भन्दै एमालेले सदन अवरुद्ध गर्दै आएको छ ।

राष्ट्रिय सभा अध्यक्ष गणेशप्रसाद तिमिल्सिनाले पटक पटक सांसदहरुलाई बस्न आग्रह गरे पनि उनीहरु निरन्तर उभिइरहेका छन् ।

प्रधानमन्त्री प्रचण्डलाई बोलाएर वास्तविकता भन्न लगाउने वचन दिए पनि सांसदहरुले नमान्दा बैठक अवरुद्ध भएको हो ।

उनले सदन पनि अगाडि बढाउने र वार्ताको वातावरण पनि बनाउने भन्दै बजेटका विषयमा छलफल चलाउन आग्रह गरे पनि एमाले सांसदहरु उभिइरहे ।

एमालेका सांसदहरुले समय समयमा मोबाइलसमेत बजाएका थिए । अध्यक्ष तिमिल्सिनाले मोबाइल नबजाउन आग्रह गरेपछि समाधान भएको थियो ।

एमाले सांसदहरु नबसेपछि अध्यक्ष तिमिल्सिनाले बैठक शुक्रबार दिउँसो १२ः२९ बजे बस्ने गरी स्थगित गरेका छन् ।

हिजो पनि सदन अवरुद्ध भएको थियो । प्रतिनिधि सभाको बैठकसमेत अवरुद्ध भएको थियो । प्रतिनिधि सभा भोलि बस्दैछ ।

प्रकाशित मिति: बिहीबार, असार २१, २०८० १३:५५

प्रतिक्रिया दिनुहोस्