डुडुवाका महिलाहरुलाई सीपमूलक व्यवसायतर्फ आत्मनिर्भर बनाइँदै

स्थानीय

गृहपृष्ठ
स्थानीय
डुडुवाका महिलाहरुलाई सीपमूलक व्यवसायतर्फ आत्मनिर्भर बनाइँदै

डुडुवाका महिलाहरुलाई सीपमूलक व्यवसायतर्फ आत्मनिर्भर बनाइँदै

मंगलबार, साउन १६, २०८० बागेश्वरी पोस्ट

नेपालगञ्ज । बाँकेको डुडुवा गाउँपालिकाका महिलाहरुलाई सीपमूलक व्यवसायतर्फ आत्मनिर्भर बनाउन थालिएको छ । लघु उद्यम विकास कार्यक्रम अन्तर्गत गाउँपालिकाले समूहमा आबद्ध ८५ जना महिलाहरुलाई सीपमूलक तालिममार्फत स्वरोजगार बनाएको छ ।

डुडुवा गाउँपालिका वडा नम्बर ५ अन्र्तगत विभिन्न समूहमा आबद्ध महिलाहरुलाई सिलाइकटाई तालिम, ढाकाको व्याग बनाउने तालिम, जुत्तीचप्पल बनाउने तालिम र ढाका कपडा उत्पादन गर्ने तालिम प्रदान गरिएको छ । तालिम पश्चात महिलाहरुलाई स्वरोजगार बनाउनका लागि गाउँपालिकाले ९ वटा सिलाइकटाई मेसिन, ९ वटा ढाकाको व्याग बनाउने मेसिन, २ वटा जुत्तीचप्पल बनाउने मेसिन र ५ वटा ढाकाको कपडा उत्पादन गर्ने मेसिन महिला समूहलाई हस्तान्तरण गरेको छ । ती महिलाहरुले समूहमा उत्पादन गर्ने सामग्री विक्री वितरण गरी आयआर्जन गर्ने उद्यम विकास सहजकर्ता सुनिता थारुले बताइन् । उनका अनुसार महिलाहरुले उत्पादन गरेका विभिन्न सामग्रीहरु स्थानीय बजारमार्फत विक्री गर्नेछन् ।

गाउँपालिकाका बेरोजगार महिलाहरुलाई उद्यम विकास कार्यक्रममार्फत सीप प्रदान गरी स्वरोजगार बनाउने उद्देश्यले कार्यक्रम संचालन गरिएको गाउँपालिकाका अध्यक्ष नरेन्द्रकुमार चौधरीले बताए । उनका अनुसार गाउँमा थुप्रै महिलाहरु बेरोजगार भई घरभित्र बसिरहेकाले उनीहरुलाई सीप सिकाएर आर्थिकरुपमा आत्मनिर्भर बनाइनेछ । सीप सिकेका महिलाहरुले उत्पादन गर्ने सामग्रीको बजारीकरणका लागि पालिकाले विशेष पहल गर्ने अध्यक्ष चौधरीले बताए । उनले पालिका अन्तर्गत सम्पूर्ण महिलाहरुलाई सशक्तिकरण तथा दक्ष बनाई आत्मनिर्भर बनाउने लक्ष्य रहेको जानकारी दिए ।

आज एक कार्यक्रमका बीच सीप सिकेका महिलाहरुलाई प्रमाणपत्र र मेसिनहरु प्रदान गरिएको छ । कार्यक्रममा गाउँपालिकाका उपाध्यक्ष शाहिदा बानो, प्रमुख प्रशासकीय अधिकृत विष्णुप्रसाद गुरुङ्ग लगायतले बोलेका थिए । गाउँपालिकाका सबै वडाका महिलाहरुलाई सीपमूलक तालिम प्रदान गरी स्वरोजगार बनाउने योजना गाउँपालिकाको छ ।

प्रकाशित मिति: मंगलबार, साउन १६, २०८० २०:१५

प्रतिक्रिया दिनुहोस्