नेपालगञ्जमा अनिश्चितकालीन कफ्र्यु आदेश

स्थानीय

गृहपृष्ठ
स्थानीय
नेपालगञ्जमा अनिश्चितकालीन कफ्र्यु आदेश

नेपालगञ्जमा अनिश्चितकालीन कफ्र्यु आदेश

मंगलबार, असोज १६, २०८० बागेश्वरी पोस्ट

नेपालगञ्ज । नेपालगञ्ज उपमहानगरपालिकामा अनिश्चितकालीन कफ्र्यु आदेश जारी गरिएको छ । सामाजिक सद्भाव एवम् धार्मिक सहिष्णुता खल्बलिने अवस्था आएपछि आज दिउँसो १ बजेदेखि अनिश्चितकालीन कफ्र्यु आदेश जारी गरेको प्रमुख जिल्ला अधिकारी विपिन आचार्यले बताए । जिल्ला प्रशासन कार्यालय बाँकेले आज एक सूचना जारी गरेर पूर्वमा राप्ती नदी पुल, पश्चिममा खजुरा रोडको इन्द्रपुर जाने बोटो, उत्तरमा राँझा चोक र दक्षिणमा जमुनाहा नाका क्षेत्रभित्र कफ्र्यु आदेश जारी गरेको जनाएको छ ।

केही दिन यता नेपालगञ्जमा धार्मिक तनाव बढेको छ । दुई समुदायबीच बढेको तनाबले उग्ररुप लिने अवस्था देखिएपछि कफ्र्यु आदेश जारी गरिएको हो । असोज १४ गते सामाजिक सञ्जालमा मुस्लिम समुदायलाई लक्षित गरी लेखिएको स्टाटसको विषयलाई लिएर मुस्लिम समुदायले गरेको विरोध प्रदर्शनका कारण उत्पन्न परिस्थिति एवम् आज ओमकार परिवार हिन्दु समाजले निकालेको र्यालीका क्रममा विवाद उत्पन्न भई नेपालगञ्ज उपमहानगरपालिका क्षेत्रमा भएको सार्वजनिक सम्पत्ति तोडफोड, ढुंगामुढा प्रहार, उच्छृंखल गतिविधि लगयातका विरोध प्रदर्शन कारण सर्वसाधारणको सुरक्षामा पर्न सक्ने सम्भावित जोखिम एवम् शान्ति भंग हुने स्थिति देखिएकाले कफ्र्यु आदेश जारी गरिएको सूचनामा उल्लेख छ ।

शान्ति र सद्भाव कायम गर्न आह्वान गर्दै आज विहान नेपालगञ्जमा सद्भाव र्याली समेत निकालिएको थियो ।