कर्मचारी आन्दोलन लम्बिँदा सेवाग्राही मर्कामा

स्थानीय

गृहपृष्ठ
स्थानीय
कर्मचारी आन्दोलन लम्बिँदा सेवाग्राही मर्कामा

कर्मचारी आन्दोलन लम्बिँदा सेवाग्राही मर्कामा

सोमबार, असोज २२, २०८० बागेश्वरी पोस्ट

नेपालगञ्ज । नेपालगञ्ज उपमहानगरपालिका लगायत बाँकेका स्थानीय तहका कर्मचारीहरुले आज पनि अत्यावश्यक सेवा बाहेक अन्य कामकाज ठप्प पारेका छन् । कर्मचारीले काम रोक्दा सेवा प्रभावित भएको छ । कर्मचारी आन्दोलन लम्बिँदा सेवाग्राही मर्कामा परेका छन् ।

नेपालगञ्ज उपमहानगरपालिका अन्तर्गत् २३ वटै वडाहरुमा कार्यरत कर्मचारीहरुले आन्दोलन स्वरुप पेन डाउन गर्दा सेवा प्रभावित भएको हो । नेपालगञ्ज उपमहानगरपालिका परिसरमा आज पनि विहान १० बजे कर्मचारीहरु जम्मा भएर सरकारलाई दबाब दिन पेन डाउन गरिएको स्थानीय तह कर्मचारी संघर्ष समितिका अध्यक्ष तेजेन्द्र रोकायले बताए ।

बाँकेका सबै स्थानीय तहहरुमा अत्यावशयक सेवा बाहेकका अन्य सवै सेवा प्रवाह ठप्प पारेर कर्मचारीहरु अनिश्चितकालीन पेन डाउनमा उत्रिएका छन् । नेपाल सरकार मन्त्रीपरिषदको गत भदौ २१ गते बसेको बैठकबाट संघीय निजामती विधेयक २०८० पारित गरी संसदमा पेश गर्ने निर्णय गरेको थियो । उक्त विधेयकमा स्थानीय कर्मचारीहरुको सेवा सुरक्षा लगायतका विषयहरु अस्पष्ट भएको भन्दै देशभरका स्थानीय तहका कर्मचारी आन्दोलनमा उत्रिएका हुन् ।

केन्द्रीय आन्दोलनका कार्यक्रम अन्तर्गत् बाँकेका स्थानीय तहका कर्मचारीहरु पनि संघर्षमा उत्रिएका छन् । कर्मचारीहरुले शुक्रबारदेखि आन्दोलन थालेका हुन् । २० बुँदे माग अघि सारेर कर्मचारीहरु आन्दोलनमा उत्रिएपछि सेवा प्रवाहमा प्रभाव परेको छ ।

प्रकाशित मिति: सोमबार, असोज २२, २०८० १६:३१

प्रतिक्रिया दिनुहोस्