डिजिटल प्रविधि र मिडियाबारे दुई दिने कार्यशाला नेपालगञ्जमा शुरु

स्थानीय

गृहपृष्ठ
स्थानीय
डिजिटल प्रविधि र मिडियाबारे दुई दिने कार्यशाला नेपालगञ्जमा शुरु

डिजिटल प्रविधि र मिडियाबारे दुई दिने कार्यशाला नेपालगञ्जमा शुरु

आइतबार, असोज २८, २०८० बागेश्वरी पोस्ट

नेपालगञ्ज । डिजिटल प्रविधि र मिडियाबारे दुई दिने कार्यशाला नेपालगञ्जमा शुरु भएको छ । पत्रकारहरुले डिजिटल प्रविधिको प्रयोग, सञ्चार सामग्री उत्पादन तथा प्रकाशन, सामाजिक सञ्जालको प्रयोग, खोजमूलक रिपोर्टिङ्गमा सूचनाको हकको प्रयोग र पत्रकार आचारसंहिताका विषयमा क्षमता अभिबृद्धि गर्न कार्यशाला संचालन गरिएको हो ।

युएसएआइडी द एशिया फाउण्डेशनको सहयोगमा सूचना र मानव अधिकार अनुसन्धान केन्द्र नेपालगन्जद्वारा संचालित “नागरिक समाज र मिडिया” परियोजना अन्र्तगत दुई दिने कार्यशाला शुरु भएको छ । कार्यशालाको आज शुभारम्भ गर्दै उच्च अदालत नेपालगञ्ज इजलासका न्यायाधीश टंक गुरुङ्गले पत्रकार भनेको समाजको ऐना भएकाले संबेदनशील भएर पेशा व्यवसाय गर्नुपर्नेमा जोड दिँदै कानूनको मापदण्डलाई विशेष ध्यान दिन आग्रह गरे । उनले नागरिकले बढी विश्वास गर्ने भएकाले पत्रकारले सत्यतथ्य सूचना सम्प्रेषण गर्नुपर्नेमा जोड दिँदै सबै क्षेत्र, वर्ग, समुदायको संबेदशिलता बुझेर मात्र पत्रकारिता गर्न आग्रह गरे । न्यायाधीस गुरुङ्गले अदालती तथा कानूनसंग जोडिएको विषयमा समाचार सम्पे्रषण गर्दा भाषा र कानूनी टर्मलोजीलाई बढी ध्यान दिनुपर्ने बताए ।

सूचना तथा डिजिटल प्रविधि विज्ञ टंकराज अर्यालले अहिले डिजिटल प्रविधिको प्रयोग गर्दा नागरिकले प्रयोग गर्ने विभिन्न डिभाइसको सुरक्षाका लागि खासै ध्यान नदिएकाले विभिन्न डिजिटल समस्या निम्त्याउने गरेको बताए । तालिममा प्रविधि अधिकार, साइबर कानून, मिडिया र डिजिटल प्रविधि, पत्रकारितामा डिजिटल प्रविधिको प्रयोग, सामाजिक सञ्जाल, फोटो, भिडियो, खोजमूलक रिपोर्टिङ्गमा सूचनाको हकको प्रयोग, सार्वजनिक सरोकारको सवाल, पत्रकार आचारसंहिता लगायतका विषयमा अर्याल, अधिबक्ता विश्वजित तिवारी, पत्रकार कृष्ण अधिकारी, राकेशकुमार मिश्र र रुपा गहतराजले सहजीकरण गर्ने संस्थाका प्रोग्राम म्यानेजर रविन्द्रकुमार ज्ञवालीले बताए । उनका अनुसार संस्थाले अवधि र थारु भाषी १५ जना पत्रकारलाई आठ महिने फेलोशिप कार्यक्रम संचालन गरेको छ ।

No description available.