दाइजो प्रथा विरुद्ध कार्ययोजना बनाउँदै नेपालगञ्ज उपमहानगरपालिका

स्थानीय

गृहपृष्ठ
स्थानीय
दाइजो प्रथा विरुद्ध कार्ययोजना बनाउँदै नेपालगञ्ज उपमहानगरपालिका

दाइजो प्रथा विरुद्ध कार्ययोजना बनाउँदै नेपालगञ्ज उपमहानगरपालिका

शनिबार, मंसिर २३, २०८० बागेश्वरी पोस्ट

नेपालगञ्ज । नेपालगञ्ज उपमहानगरपालिकाले दाइजो प्रथा बिरुद्ध कार्ययोजना निर्माण थालेको छ । नेपालगञ्ज उपमहानगरपालिकाले शुक्रबार सरोकारवालाहरुसंग कार्ययोजना तर्जुमा कार्यशाला गोष्ठी गरेर दाइजो प्रथा विरुद्ध कार्ययोजना बनाउन थालेको हो । कार्यक्रममा विभिन्न क्षेत्र र समुदायका व्यक्तिहरु उपस्थित भई कार्ययोजना निर्माणका लागि समूहगतरुपमा पृष्ठपोषण दिएका छन् ।

दाइजो प्रथा विरुद्ध काम गर्ने गरी यसअघि नै कार्यदल समेत बनाइसकेको नेपालगञ्ज उपमहानगरपालिकाले कार्ययोजना निर्माण गरी कार्यान्वयन तहमा लैजान विद्यमान ऐन कानुनको प्रभावकारीरुपमा लागू गर्न सरोकारवालाहरुको हातेमालोमा जोड दिएको छ । नेपालगञ्जमा दाइजोको समस्या चर्को रहेकाले दाइजोलाई निरुत्साहित गर्न चासो बढाइएको महिला बालबालिका शाखा प्रमुख मञ्जु पाण्डले बताइन् । नेपालगञ्जमा दाइजोले निम्त्याएको घरेलु हिंसाको ग्राफ उच्च रहे पनि धेरै घटनाहरु बाहिर नै आउँदैनन् ।

No description available.

नेपालगञ्ज उपमहानगरपालिकाका प्रमुख प्रशान्त बिष्टले लैंङ्गिक हिंसा दाइजो प्रथाले निम्त्याएकाले यसको नियन्त्रणका लागि समाजभित्रका प्रत्येक सचेत नागरिक सक्रिय हुनुपर्ने बताए । 'समाज जागेको छ, हिजोको अवस्था भन्दा अहिले केही सुधार हुँदै गएको छ,’ बिष्टले भने, ‘कानून कार्यान्वयनमा सबै जिम्मेवार हुनुपर्छ । कानून सबैमा लागू हुनुपर्छ भन्ने हुन्छ तर आफूमा आएपछि पछि नमान्ने शैलीका कारण चुनौती देखिन्छ ।’ यो समस्यालाई एकैपटक अन्त्य गर्न नसकिने तर निरन्तरको सक्रियताले केही वर्षमा सम्भव हुने बिष्टको भनाई छ । एकैपल्ट धेरे कानून बनाइन्छ तर नेतृत्व तहलाई स्वयं थाहा नहुने अवस्थाले कार्यान्वयनमा समस्या ल्याएको बिष्टले उल्लेख गरे । ‘कानून लागू गर्न बनाइन्छ, नेतृत्व तहले समयानुकूल कानून निर्माण गर्नुपर्छ,’ बिष्टले भने, ‘एक पटक बनाएर सधैंका लागि पर्याप्त हुन सक्दैन ।’

नेपालगञ्जका उपप्रमुख कमरुद्दिन राईले मानिसको सोचका कारण यो समस्याको अन्त्य हुन नसकेको बताए । ठूल्ठूला कानूनको कुरा गर्ने गरिएको भएता पनि बाध्यताको कुरा कसैले गर्न नसकेको भन्दै उनले समाजमा रहेको यो परिस्थितिलाई समेत ध्यान दिन जरुरी रहेको बताए ।

No description available.

बाँकेका प्रहरी प्रमुख प्रहरी उपरीक्षक सुवासचन्द्र बोहराले समाजलाई शान्तिपूर्ण बनाउन तथा कुनै पनि व्यक्तिमा कुनै प्रकारको बिभेद हुन नदिनका लागि प्रहरीले जिरो टोलेरेन्स नीति लिएको बताए । उनले समुदाय अनुसार फरक फरक चलन रहेको भए पनि दाइजोले नकारात्मक अवस्था निर्माण हुने हुँदा समाजका व्यक्तिसंगै घरपरिवार स्वयं पनि यसको नियन्त्रणमा लाग्नुपर्ने बताए । नेपालगञ्ज उद्योग वाणिज्य संघ तथा कशौधन बैश्य समाज बाँकेका पूर्व अध्यक्ष नन्दलाल बैश्यले यस्तो कुप्रथाबिरुद्ध सबै अगुवाको सक्रियता आवश्यक रहेको धारणा राखे ।

मानव अधिकार आयोग नेपालगञ्ज प्रमुख द्वारिका अधिकारी लगायतले बोलेको कार्यक्रममा मानवअधिकारकर्मी कमला पन्तले लैंङ्गिक हिंसा तथा दाइजो प्रथाका बारेमा प्रस्तुति राखेकी थिइन् भने नेपालमा बिद्यमान कानूनका बारेमा अधिवक्ता बिश्वजीत तिवारीले जानकारी गराएका थिए । कार्यक्रमको सञ्चालन महिला विकास अधिकृत आशा शाहीले गरेकी थिइन् ।

No description available.