जानकी गाउँपालिकामा सुकुम्वासीलाई निस्सा वितरण शुरु

स्थानीय

गृहपृष्ठ
स्थानीय
जानकी गाउँपालिकामा सुकुम्वासीलाई निस्सा वितरण शुरु

जानकी गाउँपालिकामा सुकुम्वासीलाई निस्सा वितरण शुरु

मंगलबार, मंसिर २६, २०८० बागेश्वरी पोस्ट

रविन्द्र घिमिरे/(जानकी) बाँके । जानकी गाउँपालिकामा भूमिहिन, दलित, भूमिहिन, सुकुम्वासी तथा अव्यवस्थित बसोबासीलाई निस्सा वितरणको काम शुरु भएको छ । वडा नम्वर ६ बाट आजदेखि भूमिहिन, दलित भूमिहिन, सुकुम्वासी तथा अव्यवस्थित बसोबासीलाई निस्सा वितरणकोको काम शुरु गरिएको हो ।

निस्सा वितरण कार्यक्रममा बोल्दै जिल्ला भूमि आयोगका सदस्य एवम् विज्ञ अशोक पोखरेलले भूमिहिन, दलित भूमिहिन, सुकुम्वासी जो जसरी बसिरहेका छन्, उनीहरुलाई नेपाल सरकारले तोकेको कानुनी मापदण्ड र प्रक्रिया पूरा गरेर जग्गाधनी पूर्जा वितरण गर्न नेपाल सरकारले महाअभियान चलाएको बताए । त्यसै अनुरुप जानकीमा पनि निस्सा वितरण कार्यक्रम शुरु गरिएको उनले बताए ।

कार्यक्रममा बोल्दै जानकी गाउँपालिकाका अध्यक्ष छब्बन खाँले जानकी गाउँपालिका क्षेत्रमा जति पनि भूमिहिन, दलित भूमिहिन, सुकुम्वासी तथा अव्यवस्थित बसोबास गरेर बसेका छन्, उनीहरुको लागि गाउँपालिकाको पूरै टिम लालपूर्जा मिलोस् भनेर लागिपरेको बताए । "जो-जसले जति जमिन लिई बसेका छन्, उनीहरु सबैलाई लालपूर्जा मिल्नुपर्छ भन्ने मेरो सोच हो," उनले भने ।

कार्यक्रममा वडा नम्वर ६ का वडा अध्यक्ष जगदिशप्रसाद हरिजनले पहिला जसरी जन्मसिद्ध नागरिकता पाइन्थ्यो, त्यस्तै प्रकारले निस्सा वितरणको काम पनि हुने बताए । गणकहरु पनि वडा वडामा परिचालित गरिएको बताउँदै वडा अध्यक्ष हरिजनले जिल्ला सुकुम्वासी भूमि आयोगसँग समन्वय गरेर निस्सा वितरण गरिएको जानकारी दिए । साथै निकट भविष्यमै नाप नक्सा गरी जो जसले जति जमिन लिई बसेका छन्, उनीहरुलाई त्यसमै व्यवस्थापन गर्ने उनले बताए । निस्सा वितरणका लागि पहिलाको सरकारले प्रयास मात्र गरेको तर पूरा गर्न नसकेको भन्दै उनले अहिलेको सरकारले आफ्नो कार्यकालमा पूरा गर्ने प्रतिबद्धता वडा अध्यक्ष हरिजनले व्यक्त गरे।

वडा सचिव सम्राटसिंह ठकुरीले सञ्चालन गरेको कार्यक्रममा जिल्ला भूमि आयोगका सदस्य मिना सिग्देल, जानकी गाउँपालिकाका भूमि आयोग शाखाका सम्पूर्ण कर्मचारी, स्थानीय लगायतको उपस्थिति रकेको थियो । वडा नम्बर ६ मा आज ५० जनाले निस्सा पाएका छन् ।

प्रकाशित मिति: मंगलबार, मंसिर २६, २०८० १८:५५

प्रतिक्रिया दिनुहोस्