नेपालगञ्जमा एक हप्तामा ३९७ इ-रिक्सा नियन्त्रणमा

स्थानीय

गृहपृष्ठ
स्थानीय
नेपालगञ्जमा एक हप्तामा ३९७ इ-रिक्सा नियन्त्रणमा

नेपालगञ्जमा एक हप्तामा ३९७ इ-रिक्सा नियन्त्रणमा

कागजात अद्यावधिक गर्न पुस ११ सम्मको समय दिइयो

मंगलबार, मंसिर २६, २०८० बागेश्वरी पोस्ट

नेपालगञ्ज । नेपालगञ्जमा अवैधरुपमा गुडिरहेका ३९७ इ-रिक्सा नियन्त्रणमा लिइएको छ । एक हप्ताको अवधिमा ३९७ वटा इ-रिक्सा नियन्त्रणमा लिइएको नेपालगञ्ज उपमहानगरपालिकाले जनाएको छ । नगर प्रहरी प्रमुख सूर्यबहादुर बोगटीले मंसिर १९ गतेदेखि 'अवैध इरिक्सा होल्ड अभियान' थाले यता उक्त संख्यामा इरिक्सा नियन्त्रणमा लिइएको बताए ।

नियन्त्रणमा लिए पश्चात कागजी प्रक्रिया पुर्याएर फिर्ता भएको इ-रिक्साको संख्या १६९ रहेको बोगटीले जानकारी दिए । मंसिर १९ गते १३३, २० गते ८८, २२ गते ७४, २४ गते ७८ र २५ गते २४ वटा इ-रिक्सा नियन्त्रणमा लिइएको छ । प्रक्रिया नपुर्याएका २२८ इरिक्सा अझै नियन्त्रणमा रहेको बोगटीले बताए ।

यातायात कार्यालयमा सवारी बोक्ने प्रयोजनका लागि दर्ता नै नगरी आफूखुसी गुडिरहेका रातो नम्बर प्लेटका इ-रिक्सामाथि कडाई गरिएको नगर प्रमुख प्रशान्त विष्टले बताए । नीतिनियम र प्रक्रिया विपरीत गुडिरहेका यात्रुबहाक इ-रिक्सालाई जिल्ला प्रशासन कार्यालय बाँके र नेपाल प्रहरी विधि विज्ञान प्रयोगशालामा 'होल्ड' गरेर राखिएको छ ।

नेपालगञ्ज सहरमा आवश्यकता भन्दा बढी इ-रिक्सा जथाभावी चल्न थालेपछि ट्राफिक अस्तब्यस्तता बढेको छ । दुर्घटना पनि बढ्दो छ । यो समस्यालाई मध्यनजर गर्दै नेपालगञ्ज उपमहानगरपालिकाले गैरकानुनीरुपमा चलेका इ-रिक्सामाथि निगरानी बढाएको जनाएको छ । करिब ४ हजार इ-रिक्सा गुडे पुग्ने अनुमान गरिएको नेपालगञ्जमा करिव १० हजार इ-रिक्सा गुडेका छन् । हालसम्म नेपालगञ्ज उपमहानगरपालिकामा २८०० इ-रिक्सा मात्र सूचीकृत भएको राजश्व शाखा प्रमुख विरबहादुर थापाले बताए ।

यसैबीच नेपालगञ्ज उपमहानगरपालिका क्षेत्रभित्र सञ्चालनमा रहेका इ-रिक्साहरुलाई व्यवस्थित गर्ने सम्बन्धमा नगर प्रमुख प्रशान्त विष्टको अध्यक्षतामा जिल्ला प्रशासन कार्यालय बाँकेमा सरोकारवाला निकायहरुसंग आज बसेको वैठकको निर्णय अनुसार श्रमजीवी वर्गको मागलाई मध्यनजर गर्दै इ-रिक्सासंग सम्बन्धित कागजातहरु नेपालगञ्ज उपमहानगरपालिकामा पेश गरेर बुझिलिने तथा सम्बन्धित निकायमा दर्ता र नवीकरण यही पुस ११ गतेभित्र अनिवार्यरुपमा गर्नुपर्नेछ ।

No description available.