महिला उद्यमीले गर्न लागेको प्रदर्शनी मेलाको तयारी तीव्र

स्थानीय

गृहपृष्ठ
स्थानीय
महिला उद्यमीले गर्न लागेको प्रदर्शनी मेलाको तयारी तीव्र

महिला उद्यमीले गर्न लागेको प्रदर्शनी मेलाको तयारी तीव्र

बिहीबार, पुस ५, २०८० बागेश्वरी पोस्ट

नेपालगञ्ज । नेपालगञ्जमा हुन लागेको नवौं लुम्बिनी प्रदेश स्तरीय प्रदर्शनी मेलाको तयारी तीव्र पारिएको छ । महिला उद्यमी संघ नेपाल बाँकेले हरेक वर्ष महिला उद्यमीहरुका उत्पादित वस्तुहरुलाई बजारीकरण गर्न र उद्यमताको विकास गराउन मेलाको आयोजना गर्ने गरेको छ । महिला उद्यमीहरुको प्रोत्साहनको लागि महिला उद्यमीहरुले गर्न लागेको प्रदेश स्तरीय प्रदर्शनी मेला यसपटक पुष २४ गतेदेखि नेपालगञ्जमा हुँदैछ ।

नेपालगञ्ज बागेश्वरी मन्दिर परिसरको पार्कमा हुन लागेको प्रदर्शनी मेलालाई भव्यरुपमा आयोजना गर्न विभिन्न उप–समिति गठन गरिएको आयोजक महिला उद्यमी संघ नेपाल बाँकेकी अध्यक्ष साबित्रा बस्नेतले बताइन् । उनले भनिन्,‘हामी तयारीमा जुटिरहेका छौं । विगतमा जस्तै यसपटक पनि ग्रामीणस्तरमा महिलाहरुले उत्पादन गरेका वस्तु र व्यवसायलाई प्रवद्र्धन गर्ने हाम्रो उद्देश्य रहेको छ । त्यसलाई सफल बनाउन विभिन्न उपसमिति गठन गरेर काम गरिरहेका छौं । सबैले आ–आफनो जिम्मेवारी अनुसार काम गरिरहनुभएको छ ।’

संघको बैठकले महिला उद्यमी संघ नेपाल बाँकेको प्रथम उपाध्यक्ष रेवती सिंहलाई प्रदर्शनी मेला संयोजकको जिम्मेवारी दिएको छ । यसैगरी बैठकले वविता मैनालीको संयोजकत्वमा स्वागत सत्कार तथा आवास उप–समिति गठन गरिएको छ । समितिको सदस्यमा सुशिला राणा, सुनिला बराल र गीता प्रसाईं रहेकी छिन् । नितु चन्द शाहको संयोजकत्वमा स्टल व्यवस्थापन उप–समिति, सरिता शाक्यको संयोजकत्वमा सचिवालय तथा सञ्चार उप–समिति गठन गरिएको छ । जसको सदस्यमा आभा गौतम रहेकी छिन् । शशी स्वाँरको संयोजकत्वमा आर्थिक उप–समिति, संघको पूर्व अध्यक्ष सरस्वती शर्माको संयोजकत्वमा जिल्ला समन्वय समिति, अञ्जु गुरुङको अध्यक्षतामा मञ्च व्यवस्थापन उप–समिति गठन गरिएको छ । जसको सदस्यमा सुष्मा सुवेदी र कमला टण्डन रहेकी छिन् ।
प्रदर्शनी मेला संयोजक सिंहले बाँकी रहेका अन्य उप–समितिहरु विस्तार गर्दै काम गरिरहेको बताइन् । उनले भनिन्,‘केही उप–समितिहरु गठन गर्न बाँकी छ । कार्यसमितिको बैठकले आवश्यकता अनुसार क्रमशः अन्य उप–समितिहरु गठन गर्दै जानेछ ।’

महिला उद्यमी संघ नेपाल बाँकेले एक दशक अघिदेखि महिलाहरुलाई उद्यममा प्रोत्साहन गर्नको लागि विभिन्न कार्यक्रमहरुको आयोजना गर्दै आएको छ । जस अन्तर्गत संघले हरेक वर्ष महिलाहरुको उत्पादनलाई बजारीकरणमा सहयोग गर्ने उद्देश्यले प्रदर्शनी मेला गर्ने गरेको छ । जहाँ हरेक वर्ष विभिन्न उत्पादन र वस्तुहरुको बिक्री वितरण गर्ने गरिएको छ ।

महिलाहरुले गाउँघरमा उत्पादन गरेका खाद्य वस्तु, लत्ता कपडा, अन्य सामग्री, उत्पादनको बजारीकरणमा लुम्बिनी प्रदेश स्तरीय प्रदर्शनी मेलाले महत्वपूर्ण सहयोग गर्दै आएको महिला उद्यमी संघ नेपाल बाँके अध्यक्ष बस्नेतले बताइन् ।

प्रकाशित मिति: बिहीबार, पुस ५, २०८० १८:५१