कांग्रेस बाँकेले सुरु गर्‍यो पालिका स्तरीय प्रशिक्षण कार्यक्रम

राजनीति

गृहपृष्ठ
राजनीति
कांग्रेस बाँकेले सुरु गर्‍यो पालिका स्तरीय प्रशिक्षण कार्यक्रम

कांग्रेस बाँकेले सुरु गर्‍यो पालिका स्तरीय प्रशिक्षण कार्यक्रम

शुक्रबार, फागुन २५, २०८० गौरब गिरी

नेपालगञ्ज। नेपाली कांग्रेस बाँके प्रशिक्षण शाखाको आयोजना तथा नेपाली कांग्रेस लुम्बिनी प्रदेश प्रशिक्षण विभागको समन्वयमा आजदेखि एक दिने पालिका स्तरीय प्रशिक्षण कार्यक्रम सञ्चालन गरिएको छ ।

गाउँ केन्द्रित प्रशिक्षण अभियान सञ्चालन गरिसकेको कांग्रेस बाँकेले ‘सचेत र जागरुक’ कार्यकर्ता उत्पादन तथा जनसरोकारका सवालमा पार्टीलाई अग्रसर बनाउने नीति अनुरुप आज कोहलपुरबाट प्रशिक्षण कार्यक्रमको शुभारम्भ गरेको हो । नेपाली कांग्रेसका सहमहामन्त्री बद्री पाण्डले बिरुवामा पानी हालेर प्रशिक्षणको शुभारम्भ गरेका हुन् ।

सहमहामन्त्री पाण्डेले लोकतन्त्र, स्वतन्त्रता र सामाजिक न्यायको लडाईमा कांग्रेसको सुनौलो इतिहास रहेको उल्लेख गर्दै कांग्रेस कार्यकर्ता पनि पार्टीको वैचारिक सिद्धान्तसँगै सामयिक सवालमा पनि अपडेट र सचेत हुन जुरुरी रहेको बताए। उनले कांग्रेसको इतिहास लगायत विविध पाटोका साथै पार्टी सुदृढीकरणका आयामबारे प्रशिक्षण दिएका थिए ।

यस्तै नेपाली कांग्रेस लुम्बिनी प्रदेश उपसभापति एवं प्रशिक्षण विभाग प्रमुख भुवन श्रेष्ठले, नेपाली काँगे्रसको इतिहास, आदर्श र सिद्धान्त, प्राध्यापक एवं अधिवक्ता गुणनिधी शर्माले नेपाली काँगे्रस, प्रजातन्त्र र समाजवाद, तिर्थ पौडेलेले जन सरोकारका सवाल, पार्टी संगठन, विकास, योजना, सञ्चार र कार्यसम्पादन लगायतका विषयमा जानकारी दिएका थिए।

नेपाली कांग्रेस नगर सभापति विरेन्द्र शाहले स्वागत गरेको कार्यक्रमको सभापतित्व नेपाली कांग्रेस बाँकेका कार्यवाहक सभापति एवं प्रशिक्षण शाखा प्रमुख गोपाल प्रसाद अधिकारीले गरेका थिए। पालिका र वडा तहका विभिन्न पदाधिकारी सहभागी प्रशिक्षार्थीलाई प्रमाणपत्र पनि वितरण गरिएको थियो ।

थप पालिकाहरुमा पनि लगातार प्रशिक्षण दिने कार्यक्रम रहेको नेपाली कांग्रेस बाँके प्रशिक्षण शाखा सचिव उमा थापा मगरले जानकारी दिइन । प्रशिक्षण शाखा सचिव थापामगरका अनुसार शनिवार राप्ती सोनारी गाउँपालिकामा प्रशिक्षण दिइने छ ।

प्रकाशित मिति: शुक्रबार, फागुन २५, २०८० २०:२५

प्रतिक्रिया दिनुहोस्