साइबर अपराधका घटना ६ गुणाले वृद्धि

सुरक्षा-अपराध

गृहपृष्ठ
सुरक्षा-अपराध
साइबर अपराधका घटना ६ गुणाले वृद्धि

साइबर अपराधका घटना ६ गुणाले वृद्धि

आइतबार, फागुन २७, २०८० बागेश्वरी पोस्ट

काठमाडौँ । साइबर अपराधका घटनामा पछिल्लो पाँच वर्षमा ६ गुणा बढीले वृद्धि भएको पाइएको छ ।

नेपाल प्रहरी प्रधान कार्यालय, साइबर ब्यूरोको तथ्याङ्क अनुसार आर्थिक वर्ष २०७६-७७ मा २ हजार तीन सय एक निवेदन आएकामा चालु आवको फागुन २३ सम्म १२ हजार सात सय ८९ निवेदन आएका हुन् । त्यस्तै आव २०७७-७८ मा ३ हजार नौ सय छ, आव २०७८-७९ मा ४ हजार छ सय ८६ र आव २०७९-८० मा ९ हजार १३ निवेदन परेको प्रहरी प्रधान कार्यालयले उल्लेख गरेको छ ।

प्रहरीका अनुसार चालु आवको फागुन २३ गतेसम्म अनलाइन माध्यमबाट पीडित बालकका १ सय ६४, बालिकाका २ सय ४२, महिलाका ५ हजार सात सय तीन, पुरुषका ६ हजार एक सय ७७ र अन्यमा ५ सय तीन गरी जम्मा १२ हजार सात सय ८९ निवेदन प्रधान कार्यालयमा आएका छन् ।

साइबर ब्यूरोका प्रहरी उपरीक्षक तथा प्रवक्ता दीपकराज अवस्थीले अनलाइन ठगी, अश्लील फोटो तथा भिडियो सामाजिक सञ्जालमा प्रकाशित गर्ने, अन्य व्यक्तिको नाम तथा तस्बिर प्रयोग गर्ने, वेभसाइट ह्याकिङ लगायतका अपराधका विभिन्न स्वरुपमध्ये पछिल्लो समय ब्यूरोमा आर्थिक ठगीका निवेदन बढी आएको जानकारी दिए ।

साइबर अपराधका प्रवृत्तिमा विभिन्न किसिमका नग्न तस्बीरमा व्यक्तिको मुहार जोडी अनलाइन प्रविधि राख्ने, अश्लील फोटो तथा भिडियो सामाजिक सञ्जालमा प्रकाशित गर्ने, सम्पूर्ण सूचना आफ्नो नियन्त्रणमा लिई फिरौती माग गर्ने, सामाजिक सञ्जालमा अन्य व्यक्तिको नाम तथा तस्बिर प्रयोग गरेर प्रोफाइल पेज खोली बेइज्जत गर्ने तथा दुःख दिने, सरकारी तथा अन्य सङ्घ संस्थाको वेभसाइट ह्याकिङ गर्ने, अनलाइन ठगी गर्ने जस्ता गतिविधि पर्दछन् ।

हाल यस्तो बिकृति रोक्न प्रहरीले सम्बन्धित सबैलाई सचेतना फैलाउँदै समेत आइरहेको छ ।

प्रकाशित मिति: आइतबार, फागुन २७, २०८० १०:०८

प्रतिक्रिया दिनुहोस्