लामो समयसम्म त्रिभुवन विमानस्थलमा बसेका ५० बढी प्रहरीको सरुवा

सुरक्षा-अपराध

गृहपृष्ठ
सुरक्षा-अपराध
लामो समयसम्म त्रिभुवन विमानस्थलमा बसेका ५० बढी प्रहरीको सरुवा

लामो समयसम्म त्रिभुवन विमानस्थलमा बसेका ५० बढी प्रहरीको सरुवा

बिहीबार, चैत १, २०८० बागेश्वरी पोस्ट

काठमाडौँ । त्रिभुवन अन्तर्राष्ट्रिय विमानस्थलमा लामो समयदेखि जरा गाडेर बसेका ५४ जना प्रहरीलाई एकसाथ सरुवा गरेको छ । त्रिभुवन विमानस्थलमै ५ देखि १६ वर्षसम्म बसेका प्रहरी कर्मचारीलाई उपत्यका प्रहरी कार्यालय काठमाडौंले अन्यत्रै सरुवा गरेको हो ।

उपत्यका प्रहरी कार्यालयका अनुसार लामो समय विमानस्थलमा बसेका प्रहरी कर्मचारीलाई हटाइएको हो । उनीहरुको ठाउँमा नयाँ टिम परिचालन गरिएको बताइएको छ ।

सरुवा भएकाहरुमा वरिष्ठ सईदेखि प्रहरी कार्यालय सहयोगीसम्म रहेका छन् । "विमानस्थलमा लामो समयदेखि खटिएका तल्लो तहका प्रहरी अधिकृतहरु अवैध काममा सक्रिय भएको आरोप लाग्ने गर्छ", उपत्यका प्रहरीका एक उच्च अधिकृतले बताए ।

उनका अनुसार लामो समयदेखि एकै ठाउँमा बस्ने भन्दा नयाँ टोली जाँदा काममा पनि प्रभावकारिता बढ्ने भएकाले यो निर्णय गरिएको बताए ।

त्यस्तै विमानस्थलको स्क्रिनिङमा लामो समयदेखि खटिएका ५० भन्दा बढि प्रहरीको पनि सरुवा गर्ने तयारी भइरहेको छ । त्रिभुवन विमानस्थल प्रशासनसँग समन्वय गरेर नयाँ टोलीलाई स्क्रिनिङ तालिम गराउन थालिएको उपत्यका प्रहरीले जानकारी दिएको छ ।

अब विमानस्थलमा सरुवा हुनेमा कम्तीमा एसएलसी पास गरेका प्रहरीलाई पठाउने तयारी समेत भइरहेको छ ।

प्रकाशित मिति: बिहीबार, चैत १, २०८० ०८:५०