आप्रवासी स्रोत केन्द्र तथा वित्तीय साक्षरता कक्षाको अनुगमन

स्थानीय

गृहपृष्ठ
स्थानीय
आप्रवासी स्रोत केन्द्र तथा वित्तीय साक्षरता कक्षाको अनुगमन

आप्रवासी स्रोत केन्द्र तथा वित्तीय साक्षरता कक्षाको अनुगमन

आइतबार, जेठ ६, २०८१ बागेश्वरी पोस्ट

नेपालगञ्ज । जिल्ला प्रशासन कार्यालय बाँकेभित्र रहेको आप्रवासी स्रोत केन्द्र तथा नेपालगञ्ज-१७ मा संचालित वित्तीय साक्षरता र मनोसामाजिक परामर्श कक्षाको अनुगमन गरिएको छ । सुरक्षित आप्रवासन (सामी) कार्यक्रम अन्तर्गत जिल्ला प्रशासन कार्यालयभित्र रहेको आप्रवासी स्रोत केन्द्रले वैदेशिक रोजगारसम्बन्धि सूचना र जानकारी दिने काम गर्दछ । अनुगमनका क्रममा केन्द्रद्वारा प्रवाह भइरहेका सेवा, सेवाको गुणस्तरियता, समस्याका बारेमा स्थलगतरुपमा अवलोकन गरी छलफल गरिएको छ । आप्रवासी स्रोत केन्द्रले प्रवाह गरिरहेको सेवा प्रभावकारी देखिएको पाइएको छ ।

आप्रवासी स्रोत केन्द्रले राहदानी बनाउन आएका व्यक्तिलाई वैदेशिक रोजगारीमा जानुअघि, विदेशमा काम गर्दा र फर्कंदा आइपर्ने कानुनी ज्ञान र विधिका बारेमा जानकारी गराउनुका साथै ठगी, उद्धार, राहत, विदेशबाट शव ल्याउन, क्षतिपूर्ति र बीमा सुविधाका लागि सहजीकरण गरिरहेको सामीका कार्यक्रम संयोजक कमल सिंह नेपालीले बताए । वैदेशिक रोजगारलाई सुरक्षित र व्यवस्थित बनाउन श्रम तथा रोजगार मन्त्रालय, प्रदेश सरकार र स्थानीय तहसँग समन्वय गरी आप्रवासी स्रोत केन्द्रमार्फत सूचना र जानकारी संप्रेष्ण हुन्छ । बाँकेमा जिल्ला प्रशासन कार्यालय र इलाका प्रशासन कार्यालयभित्र एक-एक वटा आप्रवासी स्रोत केन्द्र संचालनमा छन् ।

यसैगरी वडा नम्बर १७ परस्पुरमा संचालित वित्तीय साक्षरता र मनोसामाजिक परामर्श कक्षाको पनि आजै अनुगमन गरिएको छ । सामीले यस बर्ष नेपालगञ्जका ४ वटा वडामा वित्तीय साक्षरता र मनोसामाजिक परामर्श कक्षा चलाएको छ । १, १५, १७ र २१ नम्बर वडामा कक्षा चलाइएको सामाजिक परिचालन अधिकृत घनश्याम ओलीले बताए । सहजकर्ता खुमा कुमारी डाँगीले वित्तीय साक्षरता र मनोसामाजिक परामर्शकर्ता पूजा भण्डारीले मनोसामाजिक परामर्श कक्षा सञ्चालन गरेको ओलीले बताए । वित्तीय साक्षरता कक्षामा विदेशबाट आएको पैसाको हिसाबकिताबदेखि त्यसको सही परिचालन गर्ने तरिकाबारे सिकाइन्छ भने मनोसामाजिक परामर्श कक्षामा बैदेशिक रोजगारीका कारण सिर्जित मानसिक तनाव, समस्या र डिप्रेशन पीडितलाई मनोपरामर्श गरिन्छ ।

अनुगमन टोलीमा नेपालगञ्ज उपमहानगरपालिकाका उपसचिव शिक्षा महाशाखा प्रमुख गोर्खबहादुर थापा, सामाजिक गैसस साझेदारी विकास शाखा प्रमुख कृष्ण प्रसाद जोशी, कानुन शाखा प्रमुख माया शर्मा, अधिकृत शान्ति केसी, सामीका कार्यक्रम संयोजक नेपाली, सामाजिक परिचालन अधिकृत ओली लगायत सहभागी थिए ।

प्रकाशित मिति: आइतबार, जेठ ६, २०८१ १९:२९

प्रतिक्रिया दिनुहोस्