प्रेस युनियनको स्थापना दिवसमा मैत्रीपुर्ण फुटसल, भोलि स्वास्थ्य परीक्षण शिविर

स्थानीय

गृहपृष्ठ
स्थानीय
प्रेस युनियनको स्थापना दिवसमा मैत्रीपुर्ण फुटसल, भोलि स्वास्थ्य परीक्षण शिविर

प्रेस युनियनको स्थापना दिवसमा मैत्रीपुर्ण फुटसल, भोलि स्वास्थ्य परीक्षण शिविर

शनिबार, जेठ १२, २०८१ बागेश्वरी पोस्ट

नेपालगञ्ज । नेपाल प्रेस युनियनको ३३औं स्थापना दिवसको अवसरमा आज नेपालञ्जमा मैत्रीपुर्ण फुटसल गरिएको छ ।

नेपाल प्रेस युनियन बाँके शाखाले आयोजना गरेको मैत्रीपुर्ण फुटसलमा प्रेस युनियन सम्वद्ध महिला पत्रकार र नेपाल प्रजातान्त्रिक व्यवसायी संघसँग आवद्ध महिला उद्यमीहरुले प्रतिस्पर्धा गरेका थिए ।

पहिलो खेलमा महिला पत्रकार र महिला उद्यमीबीच भएको खेलमा दबै टोलीले एक-एक गोल गरेका थिए । महिला पत्रकारको तर्फबाट खेलको पहिलो हाफमा साबित्री गिरीले गोल गरेकी थिइन् । यस्तै खेलको दोस्रो हाफमा महिला उद्यमीहरुको तर्फबाट मिना चौधरीले गोल गरिन् ।

यसैगरी प्रेस युनियन सम्वद्ध पुरुष पत्रकार र नेपाल स्वास्थ्यकर्मी संघ बाँके आवद्ध स्वास्थ्यकर्मीबीच अर्को मैत्रीपुर्ण फुटसल भएको थियो । सो खेलमा स्वास्थ्यकर्मीले पत्रकारको टिमलाई ७-० ले हराएको थियो ।

आज बिहान नेपालगञ्ज आदर्शनगरस्थित बागेश्वरी फुटसल एण्ड स्पोट्र्स हबको खेल मैदानमा भएको खेलमा दोस्रो खेलमा स्वास्थ्यकर्मीको तर्फबाट डा. सुविन साहुले २ गोल, डा.शिखर शाही, सन्देश शाही, कपिल विष्ट, शिविर रेग्मीले १-१ गोल गरेका थिए ।

मैत्रीपूर्ण फुटसल प्रतियोगितालाई नेपाली कांग्रेस बाँकेका सभापति नारायण गौडेलले उद्घाटन गरेका थिए । उद्घाटनमा बोल्दै सभापति गौडेलले प्रेस युनियनको वर्तमान कार्यसमितिले सुरुआतदेखि रचनात्मक कार्यक्रम गर्दै आएको बताए ।

युनियनको स्थापना दिवसको अवसरमा सम्पूर्ण पत्रकारहरुलाई शुभकामना दिँदै सभापति गौडेलले भने, "युनियनले थुप्रै सामाजिक काम गरेको छ । समाजमा सकारात्मक सन्देश दिएको छ । यो कार्यसमिति निकै क्रियाशील छ । तपाईंहरुको साथमा नेपाली कांग्रेस बाँके सधैं रहनेछ । मैत्रीपुर्ण फुटसलले आपसी सम्बन्ध विस्तारमा सहयोग गर्नेछ । यस्ता कार्यले नयाँ उत्साह, उमंग र उर्जा थप्ने काम गर्छ ।"

नेपाल प्रेस युनियन बाँके अध्यक्ष तथा कार्यक्रमका सभाअध्यक्ष प्रियास्मृति ढकालले पत्रकारिता क्षेत्रमा विभिन्न नियमित काम गर्दै आइरहेको स्मरण गराउँदै यसपटक फरक ढंगले नयाँ कार्यक्रम आयोजना गरिएको बताए । मैत्रीपुर्ण फुटसलले पत्रकारहरुलाई स्वस्थ राख्न सहयोग गर्नुका साथै आपसमा सम्बन्ध विस्तार गर्नमा सहयोग पनि गर्ने बताए ।

कार्यक्रममा नेपाल पत्रकार महासंघ लुम्बिनी प्रदेश उपाध्यक्ष शुक्रऋषी चौलागाई, नेपाल प्रेस युनियन लुम्बिनी प्रदेश उपाध्यक्ष जयसिंह केसी, महासचिव नविन गिरी, सचिवालय सदस्य गौरव गिरी, नेपाल पत्रकार महासंघ बाँके उपाध्यक्ष करुणा शाह, महिला उद्यमी संघ नेपाल बाँके अध्यक्ष सावित्रा बस्नेत पोख्ररेल लगायतको उपस्थिति रहेको थियो ।

कार्यक्रममा उपाध्यक्ष कमल खत्रीले स्वागत गरेका थिए । स्थापना दिवसको अवसरमा भोलि युनियन बाँके शाखाले जिल्लामा क्रियाशील सम्पूर्ण पत्रकारहरुका निःशुल्क स्वास्थ्य परीक्षण शिविरको आयोजना गरेको युनियन बाँके सचिव भीष्म लोधले जानकारी दिए ।

नेपालगञ्जको गणेशमान चोकमा रहेको लक्ष्मी सरस्वती पोलिक्लिनिकको सहकार्यमा बिहान ७ बजेदेखि बाँकेका सम्पूर्ण पत्रकारहरूको पश्चिम नेपालका एक मात्र मृगौला रोग बिशेषज्ञ डा. सौरभ हमालले स्वास्थ्य परीक्षण गर्ने कार्यक्रम तय गरिएको छ । शिविरमा सहभागी हुन सम्पूर्ण पत्रकारलाई सचिव लोधले आग्रह समेत गरेका छन् ।

प्रकाशित मिति: शनिबार, जेठ १२, २०८१ १८:३६

प्रतिक्रिया दिनुहोस्