नेपालगन्ज-१२ मा बाल श्रमिकको अनुगमन

स्थानीय

गृहपृष्ठ
स्थानीय
नेपालगन्ज-१२ मा बाल श्रमिकको अनुगमन

नेपालगन्ज-१२ मा बाल श्रमिकको अनुगमन

शुक्रबार, जेठ २५, २०८१ बागेश्वरी पोस्ट

नेपालगञ्ज । नेपालगन्ज उपमहानगरपालिकाका वडा नम्बर १२ मा बालमैत्री वडा घोषणा कार्यान्वयन अवस्थाको अनुगमन गरिएको छ । बालमैत्री वडा घोषणा पश्चात आज वडाका बिभिन्न क्षेत्रमा बाल श्रमिकको अनुगमन गरिएको हो ।

बालमैत्री स्थानीय शासनको अवधारणालाई आत्मसाथ गर्दै २०७८ मा वडा नम्बर १२ बालमैत्री वडा घोषणा भएको थियो । बालमैत्री वडा घोषणा पश्चात वडाभित्र रहेका बिभिन्न होटेल, ग्यारेज, फर्निचर, सिरक, डसना पसल लगायतमा बाल श्रमिक रहे नरहेको विषयमा अनुगमन गरिएको वडा अध्यक्ष तरुण बज्राचार्यले बताए । वडा अध्यक्ष बज्राचार्य, वडा सदस्यहरु राजकुमार बाल्मिकी, सुशिला पन्त, चन्दा चिडिमार, विनोद कुमार रस्तोगी, वडा सचिब नेवलाल घर्ति, खरिदार गोरख बहादुर नेपाली, स्वास्थ्य चौकी इन्चार्ज आरती थारु, युवा घरका अध्यक्ष मन भण्डारी, सदस्य शिव कुमार वर्मा, प्रहरी वरिष्ठ हवलदार नरेन्द्र घर्ति मगर, शिक्षक जिवराज भण्डारी, स्वास्थ्य बीमा प्रतिनिधि सामना खड्का सहितको टोलीले बाल श्रमिकहरुको अनुगमन गरेका हुन् ।

अनुगमनको क्रममा नेपालगन्ज मेडिकल कलेज अगाडि रहेको एक बिरयानी पसल र विपी चोकमा रहेको फर्निचर पसलमा बाल श्रमिक राखिएको पाइएको छ । बिरयानी पसल फर्निचरमा १४ वर्षका बालक बाल श्रमिकको रुपमा काम गरिरहेको भेटिएको युवा घरका अध्यक्ष भण्डारीले बताए । अनुगमनको क्रममा वडा अध्यक्ष बज्राचार्यले व्यवसायीहरुलाई १४ वर्ष भन्दा मूनिका बालबालिकालाई श्रममा नराख्न अनुरोध गरेका थिए । बाल श्रम अन्त्य होस् भन्ने उद्देश्यले गरिएको अनुगमनको क्रममा भेटिएका बाल श्रमिकलाई आफ्नो घर फिर्ता गर्न लगाइएको बताउँदै वडा अध्यक्ष बज्राचार्यले पुनः बालबालिकालाई श्रममा राखिएको पाइएमा व्यवसायीलाई कानुनी दायरामा ल्याइने बताए ।

प्रकाशित मिति: शुक्रबार, जेठ २५, २०८१ १९:०७