बालमैत्री स्थानीय शासन सम्बन्धि दुई दिने तालिम सम्पन्न

स्थानीय

गृहपृष्ठ
स्थानीय
बालमैत्री स्थानीय शासन सम्बन्धि दुई दिने तालिम सम्पन्न

बालमैत्री स्थानीय शासन सम्बन्धि दुई दिने तालिम सम्पन्न

सोमबार, जेठ २८, २०८१ बागेश्वरी पोस्ट

नेपालगञ्ज । बालमैत्री स्थानीय शासन विषयक दुई दिने तालिम नेपालगञ्जमा सम्पन्न भएको छ । नेपालगञ्ज उपमहानगरपालिका वडा नम्बर १२ को सहयोग र युवा घरको आयोजनामा आइतबारदेखि सुरु भएको तालिम सम्पन्न भएको हो ।

तालिमको समापन समारोहमा बोल्दै नेपालगञ्ज उपमहानगरपालिका वडा नम्बर १२ का अध्यक्ष तरुण बज्राचार्यले बालमैत्री स्थानीय शासनको सिद्धान्तलाई अवलम्बन गर्दै यस अघि नै वडालाई बालमैत्री वडा घोषणा गरिसकिएको बताउँदै यसको दिगोपनाको लागि कार्ययोजनाबद्ध तरिकाले काम गर्ने बताए । स्थानीय सरकार सञ्चालन ऐन–२०७४, बालमैत्री स्थानीय शासन कार्यान्वयन कार्यबिधि २०७८ अनुसार २३ वटा वडा मध्ये वडा नम्बर १२ पहिलो बालमैत्री वडा घोषणा गरिएको भएपनि दिगोपनामा चुनौती रहेको अध्यक्ष बज्राचार्यको भनाई थियो ।

दुई दिनसम्म चलेको तालिमको समापनमा बोल्दै वडा सचिब नेवलाल घर्तीले तालिमबाट बालमैत्री स्थानीय शासनको बारेमा सबैलाई जानकारी भएको बताउँदै सबैले आ—आफ्नो जिम्मेवारी पूरा गर्न लागिपरेमा बालमैत्री स्थानीय शासनको दिगोपना हुने बताए । तालिममा बोल्दै स्वास्थ्य चौकी इन्चार्ज आरती चौधरीले बालमैत्री स्थानीय शासनलाई संस्थागत गर्न सबैको हातेमालो जरुरी रहेको बताइन् । तालिमका सहभागी आकृति चिडिमार र अभिशेष भट्टले तालिमका विषयवस्तु समय सान्दर्भिक र उपलब्धिमूलक भएको बताएका थिए ।

तालिममा प्रशिक्षक मन भण्डारी र हेमराज भट्टले बाल अधिकार, बाल संरक्षण, बालबाललिकाको आधारभूत अधिकार तथा व्यवस्था र कानुनी प्रावधान, बालमैत्री स्थानीय शासनको अवधारणा, विषय, मुख्य क्षेत्र तथा सिद्धान्त, बालमैत्री स्थानीय शासनका सूचकहरु, बालमैत्री स्थानीय शासनका चरणहरु, स्थानीय सरकारको भूमिका लगायतका विषयमा प्रशिक्षण दिएका थिए ।

तालिममा वडाका जनप्रतिनिधिहरु, कर्मचारीहरु, वडा तथा विद्यालय स्तरीय बाल क्लव सञ्जाल तथा बाल क्लवका पदाधिकारीहरु लगायत ३५ जनाको सहभागिता रहेको थियो । युवा घरका अध्यक्ष मन भण्डारीको अध्यक्षतामा भएको तालिमको समापन कार्यक्रमको सञ्चालन युवा घरका सदस्य शिव कुमार वर्माले गरेका थिए ।

प्रकाशित मिति: सोमबार, जेठ २८, २०८१ १८:३९

प्रतिक्रिया दिनुहोस्