नेपालगञ्ज-१ को सार्वजनिक सुनुवाईमा ५ बुँदे प्रतिबद्धता

स्थानीय

गृहपृष्ठ
स्थानीय
नेपालगञ्ज-१ को सार्वजनिक सुनुवाईमा ५ बुँदे प्रतिबद्धता

नेपालगञ्ज-१ को सार्वजनिक सुनुवाईमा ५ बुँदे प्रतिबद्धता

आइतबार, असार २, २०८१ बागेश्वरी पोस्ट

नेपालगञ्ज । नेपालगञ्ज उपमहानगरपालिका वडा नम्बर १ ले आर्थिक बर्ष २०८०/०८१ को सार्वजनिक सुनुवाई गरेको छ । वडा कार्यालयको आयोजना तथा बास नेपालको सहजीकरणमा वडा कार्यालयले प्रदान गर्ने सेवा तथा सुविधाको प्रभावकारिता बिषयक सार्वजनिक सुनुवाईमा ५ बुँदे साझा सार्वजनिक प्रतिबद्धताको घोषणा गरेको छ ।

यसरी गरिएका प्रतिबद्धताहरुमा वडा नम्बर १ र १८ मा पर्ने पर्यटकीय स्थान वाटरपार्कलाई थप ब्यवस्थित र आकर्षक बनाउने, वडाबाट लक्षित बर्ग उत्थानका लागि सञ्चालित सीपमूलक तालिमहरुको प्रभावकारिता मापन गर्ने, तालिम प्रदान गर्दा सीपलाई ब्यवहारमा उतार्न खोज्ने ब्यक्तिहरुको खोजी गर्ने, वडा नम्बर १ लाई थप हरियाली बनाउने र बृक्षारोपण गरिएका बिरुवाहरुको संरक्षण गर्ने, वडामा रहेका टोल विकास समितिहरुको संस्थागत विकास गर्ने, मस्जिद टोलमा बाटो, नाला, ताल निर्माण नभएकाले आगामी आर्थिक बर्षमा सडक तथा नाला निर्माण गर्ने, वडामा रहेको स्पोर्ट्स एकेडेमी लगायतका स्थान लागूऔषध प्रयोग गर्ने स्थानको रुपमा परिणत हुन लागेको भन्ने गुनासो आएकाले सो बारे ध्यानाकर्षण गरी लागूऔषध निषेधित क्षेत्रको रुपमा विकास गर्ने र सडक अतिक्रमण र सार्वजनिक जग्गा अतिक्रमण रोक्ने र सोको लागि टोल विकास संस्थाहरुसँग समन्वय गर्ने प्रतिबद्धता गरिएको छ । यसरी गरिएको साझा प्रतिबद्धतामा सरोकारवालाहरुले हस्ताक्षर गरेका छन् भने सहभागीहरुले ताली बजाएर अनुमोदन गरेका थिए ।

बास नेपालका निर्देशक हेमराज भट्टले सहजीकरण गरेको सुनुवाईमा स्वागत वडा सदस्य जंगमोहन काँदुले गरेका थिए । बासका कार्यकारी निर्देशक नमस्कार शाहले उद्देश्यमाथि प्रकाश पारेको सार्वजनिक सुनुवाईमा आर्थिक बर्ष २०८०/०८१ को प्रगति प्रतिबेदन वडा अध्यक्ष तथा सार्वजनिक सुनुवाईका प्रमुख जवाफदेही बक्ता प्रमोद रिजालले गरेका थिए । सुनुवाईको सुरुवातमा सुनुवाई पूर्व गरिएको नागरिक प्रतिबेदन पत्र र बहिर्गमन अभिमतको नतिजा घोषणा बास नेपालका जनसम्पर्क अधिकृत माधब कुमार कार्कीले गरेका थिए ।

वडाको समग्र विकासका बिषयमा झण्डै ३ घण्टा चलेको सुनुवाईको खुल्ला सत्रमा सहभागीहरुले वडाको सडक निर्माण तथा स्तर उन्नति, नाला सरसफाई, शैक्षिक गुणस्तर सुधार, स्वास्थ्य सुधार, लक्षित बर्ग उत्थान कार्यक्रम, युवा सशक्तिकरण र खेलकुद लगायतका बिषयमा प्रश्न, जिज्ञासा र सुझाव राखेका थिए । सुनुवाईको क्रममा प्रश्न राख्ने सहभागीहरुले नेपालगञ्जका अन्य वडाको तुलनामा वडा नम्बर १ को प्रगति उल्लेखनीय भएको भन्दै वडा समितिको कामको प्रशंसा गरेका थिए । सुनुवाईमा वडा अध्यक्ष रिजाल, वडा सदस्यहरु, वडा सचिव भुविन्द्र प्रसाद कँडेल, टोल विकास संस्थाका पदाधिकारीहरु, संघसंस्थाका प्रमुख तथा प्रतिनिधि र वडाबासी गरी २२० जनाको सहभागिता रहेको थियो । नेपालगञ्ज उपमहानगरपालिका वडा नम्बर १ ले वडाको सार्वजनिक सुनुवाई कार्यक्रम नियमित सञ्चालन गर्दै आएको छ ।

प्रकाशित मिति: आइतबार, असार २, २०८१ १९:०३

प्रतिक्रिया दिनुहोस्