नेपालगञ्जका सहकारी निरन्तर अनुगमन

स्थानीय

गृहपृष्ठ
स्थानीय
नेपालगञ्जका सहकारी निरन्तर अनुगमन

नेपालगञ्जका सहकारी निरन्तर अनुगमन

बुधबार, असार ५, २०८१ बागेश्वरी पोस्ट

नेपालगञ्ज । नेपालगञ्ज उपमहानगरपालिकाले आफ्नो कार्य क्षेत्र भित्रका सहकारीलाई ब्यवस्थित र मर्यादित बनाउन अनुगमन गर्दै आइरहेको छ । सहकारीहरुको आर्थिक पारदर्शिता बढोत्तरी गर्दै जनमानसमा विश्वास बढाउनका लागि ब्यवस्थित रहन निर्देशन दिने गरी अनुगमनलाई सघन बनाइएको नेपालगञ्ज उपमहानगरपालिका सहकारी शाखाले जनाएको छ ।

प्रत्येक बर्ष अनुगमन गर्दै आएको सहकारी शाखाले चालू आर्थिक वर्षमा पनि सहकारीहरुको अनुगमन गरिरहेको सहकारी शाखा प्रमुख प्रविण रानाले बताए । पछिल्लो पटक नगर भित्रका थप सात वटा सहकारीमा अनुगमन गरिएको रानाले बताए । ग्लोबल बचत तथा ऋण सहकारी संस्था, मध्यपश्चिम बचत तथा ऋण सहकारी संस्था, समाज कल्याण बचत तथा ऋण सहकारी संस्था, नमुना बहुउद्देश्यीय सहकारी संस्था, पूर्णिमा बहुउद्देश्यीय सहकारी संस्था, सफल बहुउद्देश्यीय सहकारी संस्था र अरुणोदय बचत तथा ऋण सहकारी संस्थामा अनुगमन गरिएको छ । यसअघि दुई वटा सहकारीमा अनुगमन गरिएको थियो । इन्द्रावती बचत तथा ऋण सहकारी संस्था र शारदा उपभोक्ता सहकारी संस्थामा अनुगमन गरिएको थियो ।

सहकारी शाखा प्रमुख राना, जिल्ला सहकारी संघका प्रवन्ध संचालक नवराज उपाध्याय, प्रेस सल्लाहकार नवीन गिरी सम्मिलित टोलीले अनुगमन गरिरहेको छ । कैफियत भेटिएका सहकारीलाई ब्यवस्थित बनाउन कार्ययोजना बनाएर सञ्चालक समितिबाट स्वीकृत गरी सात दिनभित्र पेश गर्न निर्देशन दिने गरिएको छ । निर्देशन अवज्ञा गर्ने सहकारीलाई कारबाहीको दायरामा ल्याइने सहकारी शाखाले जनाएको छ ।

सहकारी शाखा प्रमुख रानाले सहकारीलाई विधिसम्मत चलाउन सचेतीकरण गर्दै आएको बताउँदै अब पनि लापरबाही भेटिए सहकारी ऐन बमोजिम कारबाही गरिने प्रष्ट पारे । उनले सच्चिनका लागि मौका दिइएको बताउँदै अब त्रुटी भेटिए आगामी दिनमा कारबाहीको दायरामा ल्याइने उल्लेख गरे । अनुगमन टोली सदस्य उपाध्यायले सामान्य विषयमा पनि लापरबाही गरेको पाइएको बताए । कतिपय अद्यावधिक गर्नुपर्ने विषयमा समेत गम्भीर नदेखिएको उनको भनाई छ ।

प्रकाशित मिति: बुधबार, असार ५, २०८१ १८:००

प्रतिक्रिया दिनुहोस्