लुम्बिनी प्रदेश मन्त्री कुर्मीलाई नेपाल प्रेस युनियनको बधाई

राजनीति

गृहपृष्ठ
राजनीति
लुम्बिनी प्रदेश मन्त्री कुर्मीलाई नेपाल प्रेस युनियनको बधाई

लुम्बिनी प्रदेश मन्त्री कुर्मीलाई नेपाल प्रेस युनियनको बधाई

आइतबार, साउन १३, २०८१ बागेश्वरी पोस्ट

नेपालगञ्ज । नेपाल प्रेस युनियन बाँके शाखाले लुम्बिनी प्रदेशका नवनियुक्त मन्त्री बादशाह कुर्मीको स्वागत तथा बधाई कार्यक्रम गरेको छ । युनियन बाँकेले आज नेपालगञ्जमा एक कार्यक्रमको आयोजना गरी स्वागत तथा बधाई दिएको हो ।

कार्यक्रममा बोल्दै मन्त्री कुर्मीले युनियनले गरेको सम्मानप्रति आभार व्यक्त गरे । उनले व्यवसायिक पत्रकारिताको विकासका लागि आफूले गर्न सक्ने पहल गर्ने प्रतिवद्धता जनाए । स्वागत तथा बधाई कार्यक्रममा उनले मिडियाबाट आफू लक्षित विषयमा आइरहेका समाचारप्रति यथार्थता बुझिदिन आग्रह गरे ।

उनले मानव अधिकारकर्मीको खोल ओढेका निहित स्वार्थसिद्ध व्यक्तिले पैसाका लागि आफूमाथि निर्मला कुर्मीको हत्या आरोप लाद्ने प्रयास गरेको स्पष्ट पारे । ‘यदि कोही कसैमाथि धेरै अनुसन्धान भएको छ भने त्यो मेरोमाथि भएको छ,’ मन्त्री कुर्मीले भने, ‘सिआइबीले हालसम्म पाँच पटक मेरो बारेमा अनुसन्धान गरिसकेको छ । म दोषी भएको भए मलाई सजाय हुन्थ्यो होला त ?’

‘निर्मला कुर्मी जसको हत्या भयो भन्ने आरोप ममाथि लगाइएको छ । त्यसका बिषयमा सञ्चारकर्मी स्वयंले पनि अनुसन्धान गरेर सत्यतथ्य समाचार लेख्ने हो,’ मन्त्री कुर्मीले भने, ‘कुनै कुरामा समस्या छ भन्ने कुरा राज्यको चौथौ अङ्गले औंल्याउनुपर्नेमा आफैं न्यायाधीश भएका छन् । यो गलत हो ।’

मन्त्री कुर्मीले राजधानी काठमाण्डौं बसेर घट्नाको वास्तविकता अनुसन्धान नगरेर एक महिलाको भनाईको आधारमा समाचार लेख्नु भन्दा बाँके आएर सत्यसथ्य रिपोर्टिङ्ग गर्न पत्रकारलाई आग्रह गरे । आफू निर्दोष रहेको दाबी गर्दै उनले भने, ‘म दोषी भए जेल होइन फाँसीको सजाय भोग्न तयार छु ।’

‘जब-जब म निर्वाचनमा होमिएँ, कुनै पद पाएँ, त्यो बेला रुबि खान लगायत केही व्यक्तिहरुले मेरो चरित्र हत्या गर्न खोजे,’ मन्त्री कुर्मीले भने, ‘मैले उसको कहिल्यै केही बिगारेको पनि छैन, उसको केही खाएको पनि छैन, तर पनि म बिरुद्ध उनीहरु लागेका छन् । ४० वर्षको राजनीतिमा मैले कसैको केही बिगारेको छैन, कसैसँग एक रुपैयाँ पनि लिएको छैन ।’

प्रेस युनियन बाँकेका अध्यक्ष प्रियास्मृति ढकालको अध्यक्षतामा भएको कार्यक्रममा युनियन लुम्बिनी प्रदेशका उपाध्यक्ष जयसिंह केसी, महासचिव नवीन गिरी, नेपाली कांग्रेसका महासमिति सदस्य अजितकुमार शर्मा, खजुरा गाउँपालिका उपाध्यक्ष मञ्जु मल्ल, युनियन प्रदेश सदस्य गौरव गिरी, नेपाल पत्रकार महासंघ लुम्बिनी प्रदेशका उपाध्यक्ष शुक्रऋषि चौलागाई, अग्रज पत्रकार एवं युनियनका नेता निरज गौतम र बिजय बर्मा, पत्रकार महासंघ लुम्बिनीका सल्लाहकार राकेश कुमार मिश्र, युनियन बाँकेका निवर्तमान अध्यक्ष अर्जुन ओली, नेपाली कांग्रेस लुम्बिनीका प्रचार विभाग सदस्य रविन्द्र घिमिरे, पत्रकार महासंघ लुम्बिनीका सदस्य मोहम्मद आरिफ अन्सारी लगायतको उपस्थिति रहेको थियो ।

प्रकाशित मिति: आइतबार, साउन १३, २०८१ १९:०६

प्रतिक्रिया दिनुहोस्