कोहलपुर क्षेत्रका छाडा पशुचौपाया गौ सेवा धाममा

स्थानीय

गृहपृष्ठ
स्थानीय
कोहलपुर क्षेत्रका छाडा पशुचौपाया गौ सेवा धाममा

कोहलपुर क्षेत्रका छाडा पशुचौपाया गौ सेवा धाममा

शनिबार, साउन १९, २०८१ बागेश्वरी पोस्ट

नेपालगन्ज । कोहलपुर नगरपालिकाले कोहलपुर क्षेत्रका छाडा पशुचौपाया संकलन गरी आज राप्तीसोनारी गाउँपालिका-२ शम्शेरगन्जमा रहेको मंगल राधिका सदानन्द गौ सेवा धाममा पुर्‍याएको छ । कोहलपुर नगरपालिका क्षेत्रमा छाडा पशुचौपाका कारण सवारी दुर्घटना बढेको, नगर क्षेत्रमा रोपिएका बोटबिरुवा र किसानलाई समेत सास्ती दिएको पाइएपछि कोहलपुर नगर प्रहरी, इलाका प्रहरी र ट्राफिक प्रहरीको समन्वयमा गौ सेवा धाममा पुर्‍याइएको नगर प्रहरी प्रमुख बिरबहादुर थापाले बताए ।

नगर क्षेत्रमा रहेका छाडा पशुचौपाया कोहलपुर नगरपालिका-१२ चपरगौडीमा रहेको जनज्ञानज्योती विद्यालयको खेल मैदानमा जम्मा गरी पैदलमार्गबाट ८८ वटा पशुचौपाया गौ सेवा धाममा पुर्‍याइएको पनि थापाले बताए । उनले छाडा पशुचौपायाको संरक्षण र व्यवस्थापनका लागि गौ सेवा धामसंग भएको सहमति अनुसार ती पशुचौपाया संकलन गरी पठाइएको हो । कोहलपुर नगरपालिकाका नगर प्रमुख पुर्ण प्रसाद आचार्यले छाडा पशुचौपायाका कारण कोहलपुर नगरपालिकाको हरित नगर अभियानमा समेत असर परिरहेकोले त्यसको व्यवस्थापन गर्न खोजिएको बताए । `कोहलपुर नगर क्षेत्रमा छाडा पशुचौपायाका कारण सवारी दुर्घटना भइरहेका छन् । त्योबाट मानवीय क्षती त भएकै छ । पशुचौपाया पनि मरिरहेका छन् । अर्कोतर्फ किसानको बालिनालीमा पनि नोक्सानी भइरहेको गुनासो आइरहेको छ । नगरपालिकाको हरित नगर अभियानमा पनि छाडा पशु चौपाया बाधक भइरहेका छन् । यसको व्यवस्थापनका लागि गौ सेवा धामसंग भएको सहमति अनुसार ती पशुचौपाया संकलन गरी पठाइएको हो । यसले एकातिर कोहलपुरमा छाडा पशुचौपायाको समस्या पनि केही हदसम्म समाधान हुने र अर्कोतर्फ पशुचौपायाको संरक्षण र व्यवस्थापन पनि हाम्रो विश्वास छ´ नगर प्रमुख आचार्यले भने ।

कोहलपुर नगर क्षेत्रका छाडा पशुचौपाया संकलन तथा व्यवस्थापनका लागि कोहलपुर नगरपालिका-१२ का वडा अध्यक्ष विरेन्द्र कुमार शाहको नेतृत्वमा वडा नम्बर १३ का वडा अध्यक्ष डम्बर बहादुर खड्का, जनप्रतिनिधि, स्थानीयबासी लगायतको समेत सहभागिता रहेको थियो ।

प्रकाशित मिति: शनिबार, साउन १९, २०८१ १८:५२

प्रतिक्रिया दिनुहोस्