नेपालगन्जमा १४५ जना योग प्रशिक्षक दिक्षित

स्थानीय

गृहपृष्ठ
स्थानीय
नेपालगन्जमा १४५ जना योग प्रशिक्षक दिक्षित

नेपालगन्जमा १४५ जना योग प्रशिक्षक दिक्षित

शनिबार, भदौ १५, २०८१ बागेश्वरी पोस्ट

नेपालगञ्ज । नेपालगञ्जमा १४५ जना योग प्रशिक्षकलाई दिक्षित गरिएको छ । योग समिति नेपालले पछिल्लोपटक प्रशिक्षण लिएका १४५ जना योग प्रशिक्षकलाई दिक्षित गरेको हो ।

आज नेपालगन्ज उपमहानगरपालिका वडा नम्बर १० गोसाइँ गाउँस्थित योग प्रशिक्षण केन्द्रमा छैठौं दिक्षान्त समारोहको आयोजना गरेर योग प्रशिक्षकलाई दिक्षित गरिएको योग समिति नेपालकी उपाध्यक्ष सुमित्रा पण्डित सुवेदीले बताइन् । चार महिनासम्म लगातार प्रशिक्षण लिएका योग प्रशिक्षकलाई दिक्षित गर्ने गरिन्छ । सुवेदीका अनुसार हालसम्म ३६४ जनालाई दिक्षित गरिसकिएको छ । यसअघि २१९ जना दिक्षित भएका थिए ।

नेपालगञ्जमा केन्द्रिय कार्यालय रहेको योग समिति नेपालले हाल बाँके, बर्दिया, सुर्खेत लगायतका जिल्लामा ३० वटा योग प्रशिक्षण केन्द्र सञ्चालन गरेको अध्यक्ष गिरिराज शर्मा भट्टराईले बताए । दिक्षान्त समारोहमा सर्बोत्कृष्ट योग प्रशिक्षक २०८१ को पुरस्कार प्रशिक्षक अनिता कुमारी श्रेष्ठलाई प्रदान गरिएको छ । यस्तै विशिष्ट योग प्रशिक्षक २०८१ बाट इन्द्रा श्रेष्ठ पुरस्कृत भएकी छिन् । योग प्रशिक्षक प्रेरक अवार्डबाट पनि आधा दर्जन बढी योग प्रशिक्षक पुरस्कृत भएका छन् । यसैगरी उत्कृष्ट तीन प्रशिक्षण केन्द्र व्यवस्थापन समितिमा पहिलो वडा नम्बर १० गोसाइँ गाउँ, दोस्रो वडा नम्बर २० राँझा र तेस्रो वडा नम्बर १८ कारकाँदो घोषित भएका छन् । प्रतिनिधिसभा सदस्य डा. धवल शमशेर राणाले पुरस्कार र प्रमाणपत्र प्रदान गरेका थिए ।

पछिल्लो समय योग संस्कृति बढ्दै जाँदा योग समिति नेपालले आफूलाई अझ क्रियाशील बनाउँदै लगेको छ । दिक्षान्त समारोहमा सांसद राणा, नेपालगञ्ज उपमहानगरपालिका नगर प्रमुख प्रशान्त विष्ट, बाँकेका प्रमुख जिल्ला अधिकारी खगेन्द्र प्रसाद रिजालले मानव स्वास्थ्यलाई सुदृढ बनाउन योग अपरिहार्य रहेको भन्दै नियमित योग गर्न आग्रह गरे । समितिले आजै त्यहीँ तीजको दर पनि खुवाएको छ ।

प्रकाशित मिति: शनिबार, भदौ १५, २०८१ १८:२९

प्रतिक्रिया दिनुहोस्