'चलचित्र पत्रकारितामा महिला पत्रकारलाई प्राथमिकता दिनुपर्छ'

स्थानीय

गृहपृष्ठ
स्थानीय
'चलचित्र पत्रकारितामा महिला पत्रकारलाई प्राथमिकता दिनुपर्छ'

'चलचित्र पत्रकारितामा महिला पत्रकारलाई प्राथमिकता दिनुपर्छ'

बुधबार, भदौ १९, २०८१ बागेश्वरी पोस्ट

नेपालगन्ज । बाँकेका महिला पत्रकारहरुले चलचित्र पत्रकार संघ नेपाल बाँके शाखाले चलचित्रसम्बन्धि समाचार र लेखनप्रति महिला पत्रकारहरुको आकर्षण बढाउन प्राथमिकता दिनुपर्ने बताएका छन् । आज चलचित्र पत्रकार संघ नेपाल बाँके शाखाले तीज विशेष भेटघाट कार्यक्रममा आयोजना गरेको ‘चलचित्र क्षेत्रमा महिला पत्रकारहरुको सक्रियता’ विषयक अन्तरक्रियामा उपस्थित महिला पत्रकाहरुले जिल्लाका महिला पत्रकारहरुबीच चलचित्रसम्बन्धि लेखन प्रतियोगिता समेत अयोजना गर्न सकिनेमा जोड दिएका हुन् ।

खुल्ला अन्तरक्रिया कार्यक्रममा बोल्दै वरिष्ठ महिला पत्रकार अक्षरी पोखरेलले चलचित्र पत्रकार संघले चलचित्रसम्बन्धि लेखन गराउने र उत्कृष्ट लेखन गर्ने महिला पत्रकारलाई पुरस्कारको व्यवस्था गर्ने जस्ता कार्यक्रमको अयोजना गर्नुपर्ने बताइन् । उनले अन्य पत्रकार संगठन भन्दा चलचित्र पत्रकार संघले फरक ढंगले कार्यक्रम अयोजना गर्दै आएको बताउँदै प्रदर्शनमा आएका नयाँ नेपाली चलचित्रका बारेमा लेख्न महिला पत्रकारहरुलाई प्रेरित गर्नुपर्ने बताएन् ।

पत्रकार विमला चौधरीले चलचित्र पत्रकारले तीज कार्यक्रम आयोजना नगरेसम्म तीज आएको अनुभूति नहुने गरेको बताउँदै चलचित्र पत्रकार संघले बेला बेलामा नेपाली चलचित्र निःशुल्क पत्रकारहरुलाई हेर्ने व्यवस्था मिलाए पनि कसैले उक्त चलचित्रका विषयमा लेख्ने नगरेको बताइन् । उनले वर्षभरी आएका चलचित्र, तिनीहरुको प्रदर्शन कस्तो रह्यो भन्ने विषयमा महिला पत्रकारहरुलाई लेख लेख्न प्रेरित गर्नुपर्ने बताइन् ।

कार्यक्रममा पत्रकार रुपा गहतराजले नेपालगन्जबाट पनि चलचित्र पत्रकार संघले कलालाई समेटेर कम्तिमा वार्षिक बुलेटिन प्रकाशन गर्नुपर्ने बताइन् ।

कार्यक्रममा प्रमुख अतिथि नेपाल पत्रकार महासंघ बाँके शाखाकी उपाध्यक्ष करुणा शाह (महारानी) ले चलचित्र पत्रकार संघ बाँके शाखाले हरेक कार्यक्रम संचालन गर्दा केही नयाँ सन्देश दिने गरी आयोजना गर्ने गरेको बताइन् । उनले बाँके शाखामा पुरुष अध्यक्ष भएता पनि महिला विशेष कार्यक्रममा कार्यसमितिमा रहेका फरक फरक महिलाहरुलाई कार्यक्रममा अध्यक्षता गराउन, कार्यक्रम संचालन गर्न पठाउने जस्ता नयाँ कामहरुको सुरुवात गरेको बताइन् । चलचित्र पत्रकार संघले जसरी कार्यक्रमहरुमा महिला पत्रकारहरुलाई प्राथमिकता दिएको हुन्छ त्यसरी नै अन्य पत्रकार संघहरुले पनि कार्यक्रमहरुमा महिला पत्रकारहरुलाई प्राथमिकता दिनु पर्नेमा उनले जोड दिइन् ।

कार्यक्रमको अध्यक्षता गरेकी चलचित्र पत्रकार संघ बाँके शाखाकी सह–सचिव लक्ष्मी तिमिल्सेनाले अन्तरक्रियामा उठेका कुराहरुलाई बाँके शाखाले कार्यान्वयनमा ल्याउन योजना बनाएर अघि बढ्ने बताइन् ।

प्रकाशित मिति: बुधबार, भदौ १९, २०८१ २०:३९

प्रतिक्रिया दिनुहोस्