कोहलपुरमा प्रमुख प्रशासकीय अधिकृत गिरीलाई स्वागत

स्थानीय

गृहपृष्ठ
स्थानीय
कोहलपुरमा प्रमुख प्रशासकीय अधिकृत गिरीलाई स्वागत

कोहलपुरमा प्रमुख प्रशासकीय अधिकृत गिरीलाई स्वागत

मंगलबार, असोज १, २०८१ बागेश्वरी पोस्ट

कोहलपुर । कोहलपुर नगरपालिका कार्यालयमा प्रमुख प्रशासकीय अधिकृतका रुपमा सरुवा भई आएका मानबहादुर गिरीलाई नगरपालिकाले स्वागत गरेको छ ।

प्रमुख प्रशासकीय अधिकृत गिरीका लागि आयोजित स्वागत र परिचयात्मक कार्यक्रममा नगर प्रमुख पूर्ण प्रसाद आचार्य, नगर उपप्रमुख संगिता सुवेदी, नगर प्रवक्ता नमबहादुर आलेले स्वागत गरेका थिए ।

त्यसक्रममा नगर प्रमुख आचार्यले कोहलपुर नगरपालिकाले प्रदान गर्ने सार्वजनिक सेवा प्रवाहलाई जनतामुखी गराउन गिरीको भूमिका प्रभावकारी हुने विश्वास व्यक्त गरे । उनले कोहलपुरको सम्बृद्धि, सुशासन, पारदर्शिता र जवाफदेहिता कोहलपुर नगरपालिकाको संकल्प भएकाले प्रमुख प्रशासकीय अधिकृत गिरीको त्यसलाई कार्यान्वयन गर्ने सवालमा सहयोगीपूर्ण भूमिका हुने पनि उल्लेख गरे । अन्य पालिकामा पनि गिरीले प्रमुख प्रशासकीय अधिकृतको जिम्मेवारी निर्वाह गरिसकेकाले कोहलपुरले अनुभवी र परिपक्व प्रशासक पाएकोमा खुसी व्यक्त गरे ।

यस्तै स्वागत तथा परिचयात्मक कार्यक्रममा नगर उपप्रमुख सुवेदीले जनप्रतिनिधिले गरेका निर्णयहरु कार्यान्वयनमा प्रमुख प्रशासकीय अधिकृतको भूमिका महत्वपूर्ण हुने भएकाले त्यसमा समन्वयकारी भूमिका खेल्न गिरीलाई सुझाव दिइन् । उनले कोहलपुरको वृहत्तर विकासका लागि जनप्रतिनिधि र कर्मचारीबीचको सम्वन्ध अत्यन्तै सकारात्मक हुन आवश्यक रहेकोमा पनि जोड दिइन् ।

प्रमुख प्रशासकीय अधिकृत गिरीले सरकारको नीति र कानुनमा बसेर आफ्नो जिम्मेवारीलाई कुशलतापूर्वक निर्वाह गर्ने प्रतिबद्धता व्यक्त गरे । उनले जनप्रतिनिधिले गर्ने निर्णयलाई आफूले कार्यान्वयन गर्ने कुरामा पनि विश्वास दिलाए । कार्यक्रममा कोहलपुरका राजनीतिक दलका नेता, जनप्रतिनिधि, कर्मचारी, सुरक्षाकर्मी, शिक्षक, पत्रकार लगायतको सहभागिता रहेको थियो ।

प्रकाशित मिति: मंगलबार, असोज १, २०८१ १८:२२